Түркістан қаласының әкімі Рашид Аюпов «Әзірет Сұлтан» мемлекеттік тарихи-мәдени қорық-музейімен танысты. Қожа Ахмет Ясауи кесенесі және оның аумағындағы тарихи-мәдени нысандардың тарихымен танысып шыққан қала басшысы 88,7 га аумақты сақтап-қорғау бағытында атқарылып жатқан жұмыстар бойынша пікір бөлісті. Бұл туралы «Әзірет Сұлтан» мемлекеттік тарихи-мәдени қорық-музейінің баспасөз қызметіне сілтеме жасаған didarbek.kz ақпараттық агенттігі хабарлайды.
«Әзірет Сұлтан» мемлекеттік тарихи-мәдени қорық-музейінің директоры Нұрболат Ахметжанов Мәдениет және спорт министрлігінің тапсырмасымен Қожа Ахмет Ясауи кесенесі аумағының тарихи қалпын сақтай отырып қайта жаңарту, туристерді тарту бағытында қолға алынған үш жылдық жоба-жоспарлар және қорық-музей жасаған бес жылдық жоба-жоспарларды таныстырып, атқарылып жатқан жұмыстарды көрсетті.
Айта кетейік, «Әзірет Сұлтан » қорық музейі Қазақстандағы ерекше маңызы бар рухани орталық болып табылады. Мұнда қазақ халқының тарихы мен рухы насихатталады.Қазақтың ел билеген хандары мен елін жерін қорғаған батырлары, би-шешендерінің мәңгілік мекендері ретінде олардың рухтарына тағзым етіледі, халқымызды имандылыққа, адамгершілікке, адалдыққа тәрбиелейтін Қожа Ахмет Ясауидің мұрасы насихатталады.
© DIDARBEK.kz
