Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті сыбайлас жемқорлықтың себептері мен жағдайларын жою бойынша ұсынуларды онлайн форматта қарау тәжірибесін жалғастыруда (ҚР ҚПК 200-бабы шеңберінде).
Бүгін қалалық Сыбайлас жемқорлыққа қарсы қызметі басшысы А.Жұмағали мен Полиция департаментінің бастығы Е.Жұмаханбетовтың қатысуымен жиын өтті.
Іс-шара барысында сыбайлас жемқорлық қылмыс жасаған Ішкі істер органдарының қызметкерлеріне қатысты қылмыстық істер бойынша бірқатар ұсынулар қаралды.
Кездесу барысында А.Жұмағали төтенше жағдай кезіндегі Департаменттің жұмысына, сондай-ақ сыбайлас жемқорлыққа қарсы іс-қимыл бойынша қабылданып жатқан шараларға тоқталды.
«Жемқорлықты анықтауға және оның себептерін жоюға бағытталған алдын алу шараларын жасақтап, дайындау біздің ортақ міндетіміз.
Өкінішке орай, бүгінгі таңда полиция қызметкерлері сыбайлас жемқорлық құқық бұзушылық субъектілері болып табылатын кейбір фактілер орын алуда.
Сондықтан да, осы отырыстың басты мақсаты, сыбайлас жемқорлыққа жол бермеу, олардың алдын алу болып табылады», – деп атап өтті Асхат Жұмағали.
Сыбайлас жемқорлыққа қарсы іс-қимыл Агенттігінің қалалық департаменті басшысының орынбасары Б.Узынжас қылмыстық істердің мән-жайлары, сондай-ақ сыбайлас жемқорлық көріністеріне жол бермеу бойынша нақты ұсыныстар енгізе отырып баяндама жасады.
Өз кезегінде қалалық Сыбайлас жемқорлыққа қарсы іс-қимыл Агенттігінің қалалық департаменті басшысының бірінші орынбасары Т.Серікбаев мемлекеттік органдардың бірінші басшыларының қол астындағылардың сыбайлас жемқорлық құқық бұзушылықтар жасағаны үшін жауапкершілігі туралы заңнама нормаларын түсіндірді.
Ұсынуларды қарау барысында полиция қызметкерлері арасындағы сыбайлас жемқорлық әрекеттеріне ықпал ету себептері мен жағдайлары егжей-тегжейлі қаралды.
Онлайн шара қорытындысы бойынша Шымкент қаласының полиция басшылығына бірқатар басшыларды тәртіптік жауапкершілікке тарту және сыбайлас жемқорлықтың алдын алу бойынша жұмысты күшейту ұсынылды.
Айта кетейік, жыл басынан бері 6 полиция қызметкері қылмыстық жауапкершілікке тартылып, 1 тұлғаға қатысты айыптау үкімі шығарылды.
© Сыбайлас жемқорлыққа қарсы іс-қимыл Агенттігінің
Шымкент қаласы бойынша департаменті
