Бүгін Ұлттық қоғамдық сенім кеңесінің 3-отырысында ел Президенті ақ халаттылар жайлы жақсы жаңалық айтты. Яғни, Қасым-Жомарт Кемелұлы дәрігерлердің жалақысы экономикадағы орташа табыстан 2,5 есе артық болуы керек екенін жеткізді. Одан бөлек, бұл жоспар 2023 жылға дейін іске асуы қажеттігін тілге тиек етті. Бұл дегені – Мемлекет басшысы медицина саласындағы мамандардың қажырлы еңбегі ескерусіз қалғанын қаламайтынын аңғартады.
Осы ретте Қ.Кемелұлы: «2010 жылдан бері денсаулық сақтау саласы мен экстенсивті тиімділіктің кейбір бағыттарын оңтайландыруға баса мән бердік. Нәтижесінде, 1000-ға жуық жұқпалы ауруларға арналған орын қысқарды. Биологиялық қауіп-қатерлерді ескере отырып, Үкімет белгілі бір бағыттар бойынша денсаулық сақтау жүйесіндегі рұқсат етілген артықшылық мәселесін қарастырып, оның қиын-қыстау жағдайларға дайын болуына қолдау көрсетуі қажет”, – деді. Бұл да елімізде денсаулық саласы бұрыннан басты назарда екенін көрсетеді.
Өз кезегінде ел Президенті ауылдық жерлердегі денсаулық сақтау ісінің тиімді үлгісін жасау шараларының орындалуын, дәрі-дәрмектер және медициналық жабдықтармен қамтамасыз ету мәселесін шешуді де назардан тыс қалдырмады. Аталған өзгерістер – көп түйткілді шешіп, адами капиталдың сапасын арттыратын қадам. Жеке өзім осылай есептеймін және сәттілік тілеймін.
©Әлия Молдыбаева,
№13 қалалық емханасы бас дәрігерінің міндетін атқарушы
