Шымкент қаласында жыл басынан бері еңбек қауіпсіздігін сақтау бойынша 586 тексеру жүргізілген. Нәтижесінде 477 еңбек заңдылығын бұзу фактісі анықталып, ескертпелер түзілген. Кәсіподақ ұйымдары 55 еңбек дауын шешуге және 5 жазатайым оқиға орын алған жағдайларды зерттеуге қатысқан.
Бұл туралы «Шымкент қаласы кәсіподақтар орталығы» аумақтық кәсіподақтар бірлестігінің төрағасы Берік Бекжанов БАҚ өкілдеріне 6 айда атқарылған жұмыстар жөніндегі брифингте баяндады. Берік Айдарбекұлы еңбек инспекциясымен бірге, үшжақты құрылған комиссия жұмысы нәтижесінде жүзеге асқан бірқатар шаруаларға тоқталды.
– Үш жақты комиссиямен жалақы қарыздарын шешу бағытында тиісті жұмыстар атқарылды. Жыл басынан бері 9 мекеменің 819 жұмыскер алдындағы 121,8 млн теңге жалақы қарызы болса, 6 айдың қорытындысымен оның саны 3 мекемеге азайды. 740 жұмыскердің 107 млн теңге жалақы қарызы өтелді. Дегенмен, 6 кәсіпорынның 79 жұмыскер алдындағы 14,6 млн теңге жалақы қарызы қалып отыр. 2019 жылдың 6 айында жазатайым оқиғалар саны өткен жылдың тиісті кезеңімен салыстырғанда 13 оқиғаға азайды. Қалада 24 жазатайым оқиға болып, оның салдарынан 24 адам зардап шеккен. Ауыр жарақаттанған адам саны — 8, жеңіл жарақаттанғаны — 13, — деді Берік Айдарбекұлы.
Сондай-ақ, Шымкентте жұмыс істеп тұрған 21 661 кәсіпорынның 1033-де ұжымдық шарт жасалған. Бүгінде кәсіподақтар орталығы жанында жұмыс істейтін татуласу орталығында жалпы 392 адамға көмек көрсетілген.
Брифингте кәсіподақ төрағасы еңбек шартын жасасудың маңыздылығы, цифрлық жүйені енгізу, еңбек заңдылықтарына мониторинг жүргізудің маңыздылығы жөнінде айтып өтті.
