ЖРВИ және тұмаумен сырқаттанушылықтың маусымдық өсуіне байланысты білім беру ұйымдарында инфекцияның таралуын болдырмауға бағытталған профилактикалық шаралар қарастырылған. Атап айтқанда, бір инкубациялық кезең ішінде сынып оқушыларының 20 пайызы ЖРВИ-мен ауырған жағдайда кабинеттік оқыту жүйесі тоқтатылып, күнтізбелік 10 күн ішінде сыныпқа жаңа оқушыларды қабылдауға шектеу қойылады. Ал сырқаттанған оқушылардың үлесі 30 пайызға және одан жоғары болған жағдайда білім алушылар онлайн оқыту форматына ауыстырылады. Бұл шаралар оқу орындарында инфекцияның таралуын шектеуге және балалардың денсаулығын қорғауға бағытталған.
Оқу жылының басталуымен балалардың ұйымдасқан ұжымдардағы байланысы артып, вирустық инфекциялардың таралу қаупі жоғарылайды. Осыған байланысты білім беру ұйымдарында күнделікті таңертеңгілік сүзгі жүргізу, оқушылардың денсаулық жағдайын бақылау және ауру белгілері байқалған балаларды уақытылы анықтау маңызды. Сонымен қатар оқу кабинеттері мен басқа да бөлмелерді тұрақты желдету, санитариялық тазалықты сақтау және қолды өңдеуге арналған антисептиктердің жеткілікті болуын қамтамасыз ету қажет.
Мамандардың айтуынша, ЖРВИ мен тұмаудың алдын алуда қарапайым санитариялық-гигиеналық талаптарды сақтау маңызды рөл атқарады. Инфекция жұқтыру қаупін төмендету үшін адам көп жиналатын орындарға баруды шектеу, жабық қоғамдық орындарда маска тағу, қолды сабынмен жиі жуу немесе антисептик қолдану ұсынылады. Сондай-ақ үй-жайлар мен оқу кабинеттерін жүйелі түрде желдетіп, күнделікті ылғалды тазалау жүргізу қажет. Жөтелгенде немесе түшкіргенде ауыз бен мұрынды майлықпен немесе шынтақтың бүгілген тұсымен жабу да инфекцияның таралуын азайтуға көмектеседі.
Бұдан бөлек, білім беру ұйымдарында санитариялық талаптардың сақталуы мен профилактикалық шаралардың жүйелі жүргізілуіне назар аудару қажет. Ата-аналарға балалардың денсаулық жағдайын бақылап, ауру белгілері байқалған жағдайда оларды мектепке немесе балабақшаға жібермеу ұсынылады. Бұл өзге балаларға инфекция жұқтыру қаупін төмендетуге мүмкіндік береді.
Мамандар ауру белгілері байқалған жағдайда өзін-өзі емдеумен айналыспай, медициналық көмекке жүгінуге кеңес береді. Әсіресе дене қызуының көтерілуі, жөтел, тамақ ауруы және жалпы әлсіздік сияқты белгілер пайда болған кезде дәрігердің кеңесін алған жөн. Сонымен қатар науқас адамдармен жақын қарым-қатынасты шектеу және жеке гигиена талаптарын сақтау маңызды. Алдын алу шараларын сақтау ЖРВИ мен тұмаудың таралу қаупін азайтып, балалар мен ересектердің денсаулығын қорғауға ықпал етеді.
