Шымкентте тұрғындарды бұқаралық спортқа тарту, кәсіби спортты дамыту және спорттық инфрақұрылымды жаңғырту бағытындағы жұмыстар жалғасуда. Қалада жаңа нысандар салумен қатар, қолданыстағы кешендерді жөндеу және шалғай елді мекендерді спорт инфрақұрылымымен қамтуға басымдық берілуде.
Бұл туралы Өңірлік коммуникациялар қызметінің ақпарат алаңында өткен брифингте Шымкент қаласы Дене шынықтыру және спорт басқармасы басшысының орынбасары Ермек Аманжолұлы мәлімдеді.
Қазіргі таңда қаладағы 35 спорт ұйымында 65 спорт түрі дамытылуда. Оқу-жаттығу процесіне 1 121 жаттықтырушы тартылған. Спорттық мекемелерде 18 242 спортшы тұрақты түрде жаттығады. Жыл басынан бері 25 спорттық-бұқаралық іс-шара өткізіліп, жыл соңына дейін тағы 4 іс-шара ұйымдастыру жоспарланған.
Бұқаралық спортты дамыту мақсатында қаланың 13 саябағы мен аллеясында таңғы жаттығулар өткізіледі. Бұл жұмыстар тұрғындардың дене белсенділігін арттырып, салауатты өмір салтын қалыптастыруға бағытталған.
Қазіргі таңда Шымкентте 877 спорт нысаны бар. Биыл Қаратау ауданындағы Тұран шағынауданында дене шынықтыру-сауықтыру кешенін және Базар қақпа тұрғын алабындағы стадион аумағында қосымша спорт нысанын салу жоспарланып отыр. Сонымен қатар Тұран-2 шағынауданында 60 мың көрерменге арналған стадионның, ал Тұран шағынауданында Паралимпиадалық және сурдлимпиадалық спорт кешенінің құрылысы жүргізілуде.
Қолданыстағы спорт нысандарын жаңарту жұмыстары да назардан тыс қалған жоқ. «Мұз сарайы», Локомотив стадионы, Шаумян көшесіндегі футбол алаңы және бірқатар спорт кешендерінде ағымдағы және күрделі жөндеу жұмыстарын жүргізу жоспарланған.
Бұдан бөлек, шалғай елді мекендерде спорт нысандарын салу үшін жер телімдерін заңдастыру және тиісті ұсыныстар әзірлеу жұмыстары жүргізілуде. Бұл бастамалар тұрғындардың спортпен айналысу мүмкіндігін кеңейтіп, балалар мен жастардың спорттық қабілеттерін дамытуға жағдай жасайды.
Жалпы, жаңа спорт нысандарын салу, қолданыстағы кешендерді жаңғырту және бұқаралық спортты қолдау жұмыстары Шымкенттің спорттық әлеуетін арттыруға бағытталған. Жоспарланған жобалар жүзеге асқан жағдайда, тұрғындар үшін спортпен тұрақты айналысуға қолайлы жағдай қалыптаспақ.
Осылайша, қалада спорт инфрақұрылымын дамыту жұмыстары тұрғындардың спортқа қызығушылығын арттырып, салауатты өмір салтын қалыптастыруға және бұқаралық спорттың қолжетімділігін кеңейтуге мүмкіндік береді.
