Шымкент соңғы жылдары экономикалық белсенділігін арттырып, инвестиция тарту, жаңа өндірістер ашу және инфрақұрылымды жаңғырту бағытында ауқымды жобаларды жүзеге асырып келеді. Соңғы үш жылда қала экономикасына 2,3 триллион теңге инвестиция тартылып, оның 75 пайызы жеке инвесторлардың қаражатын құрады. Осы кезеңде 170 миллиард теңгенің 50 ірі жобасы іске қосылып, 3,5 мыңнан астам жаңа жұмыс орны ашылды.
Бүгінде қала экономикасының өсімі 10 пайызға жетіп, Шымкент республика бойынша үздік бестіктің қатарына енді. Соңғы үш жылда қала бюджеті 1,4 есеге өсіп, 868 миллиард теңгеге жетсе, өз кірістері 644 миллиард теңгені құрады. Бұл көрсеткіштер экономикалық белсенділіктің артқанын көрсетеді.
ӨНЕРКӘСІПКЕ БАСЫМДЫҚ БЕРІЛУДЕ
Қалада өнеркәсіптік жобаларға ерекше басымдық берілуде. Соның бірі – трансұлттық Coca-Cola компаниясының жобасы. Оған 27 миллиард теңге инвестиция салынып, 100-ден астам тұрақты жұмыс орны құрылды. Ірі инвесторлардың келуі жаңа технологиялар мен заманауи өндіріс мәдениетін енгізуге мүмкіндік береді.
Сонымен қатар халықаралық ынтымақтастық аясында жаңа жобалар жүзеге асуда. Құны 54 миллиард теңге болатын қалдықтарды өңдеу зауыты тәулігіне 1000 тоннаға дейін қалдық өңдеп, 24 МВт-қа дейін электр энергиясын өндіруге мүмкіндік береді. Жоба іске қосылғанда 80 тұрақты жұмыс орны ашылады.
Агроөнеркәсіптік кешенде де ірі жобалар қолға алынған. 650 гектар аумақта заманауи жылыжай кешендерін дамыту жоспарланса, Түркияның Alarko Holding компаниясы 650 миллион доллар, польшалық Fabe Polska 136 миллион доллар инвестиция салуды көздеп отыр. Бұл жобалар ауыл шаруашылығы өндірісімен қатар логистика, сақтау, өңдеу және қаптама салаларының дамуына серпін береді.
ИНФРАҚҰРЫЛЫМ – ЭКОНОМИКАЛЫҚ ДАМУДЫҢ НЕГІЗІ
Инвестициялық жобаларды жүзеге асыруда инженерлік инфрақұрылымның маңызы зор. Бүгінде Шымкент тұрғындары ауыз сумен, ыстық сумен және электр энергиясымен толық қамтылған. Табиғи газбен қамту 98 пайызға, кәріз жүйесімен қамту 70 пайыздан асты.
33 шақырым су құбыры мен 50 шақырым жылу желісі жаңартылып, 600-ге жуық трансформаторлық станция орнатылды. Сонымен қатар шамамен 1000 шақырым электр желісі тартылды.
Көлік инфрақұрылымы да жаңғыртылуда. Соңғы жылдары 1500 шақырымнан астам жол жөнделіп, ірі жолайрықтар пайдалануға берілді. Бәйдібек би–Қ.Төлеметов жолайрығы, К.Тіленшин көшесіндегі өткел және Д.Қонаев даңғылы мен А-2 транзиттік жолын реконструкциялау жұмыстары жалғасуда. Бұл жобалар қаланың көлік-логистикалық әлеуетін күшейтеді.
ӘЛЕУМЕТТІК САЛА – АДАМ КАПИТАЛЫНЫҢ НЕГІЗІ
Экономикалық өсім тұрғындардың өмір сапасымен тығыз байланысты. Соңғы үш жылда қалада 60 жаңа мектеп ашылып, үш ауысымды және апатты мектептер мәселесі шешілді. Денсаулық сақтау саласында 13 медициналық нысан іске қосылып, жедел жәрдем автопаркі 65 көлікпен толықты. Сонымен қатар екі модульдік спорт кешені мен 75 спорт алаңшасы салынды.
Қалада қоғамдық кеңістіктер де көбейіп келеді. Бір жыл ішінде 45 жаңа гүлзар, саябақ және қоғамдық кеңістік ашылып, олардың жалпы саны 90-ға жетті. Бұрынғы қоқыс полигонының орнында 45 гектар аумақта «Экопарк» бой көтерді, Қошқар-Ата өзенінің 6,9 шақырым жағалауы абаттандырылды.
Алдағы кезеңдегі басты міндет – инвестиция көлемін ғана арттыру емес, оның тиімділігін күшейту. Жаңа өндірістердің технологиялық деңгейін көтеру, жоғары өнімді жұмыс орындарын көбейту және шағын және орта бизнестің ірі жобалар айналасында дамуына жағдай жасау маңызды.
Шымкент бүгінде инвестиция тартатын қаладан өндіріс, технология және логистика тоғысқан экономикалық орталыққа айналу кезеңінде. Өнеркәсіп, агроөнеркәсіп, инфрақұрылым және әлеуметтік саланың қатар дамуы қаланың ұзақ мерзімді экономикалық өсіміне негіз қалыптастырып отыр.
Фото — egemen.kz
