Бүгін Келес ауданының әкімі Ақментай Есбаев Бірлік ауылдық округінің тұрғындарымен кездесті. Бұл туралы Келес ауданы әкімінің баспасөз қызметіне сілтеме жасаған «didarbek.kz» ақпараттық агенттігі хабарлайды.
Жиында Бірлік ауылдық округі әкімі 2019 жылы 6 айда атқарған жұмыстарының, сондай ақ округ аумағына жауапты учаскелік полицейдің есебі тыңдалды. Жиын барысында округ әкімі мен учаскелік инспектор атқарған жұмыстары жайлы баяндама жасап, жиынға қатысушылар тарапынан сұрақтарға жауап берді.
Жалпы Бірлік ауылдық округі аумағында атқарылған жұмыстарға тоқталсақ: Бірлік ауылдық округінде елді мекендерге табиғи газ құбырын тарту жұмысы қарқындап келеді. Атап айтқанда Бірлік, Жаңатіршілік, Үшағаш, Қосөткел ауылдарына табиғи газбен қамтамасыз ету құрылысы ішкі жүйелерінің жобасына ЖСҚ әзірленіп мемлекеттік сараптаманың оң қортындысы алынып, бюджеттік өтінімге ұсынылған. Аталған елді мекендерге табиғи газбен қамтамасыз ету үшін алдымен газ жеткізуші құбырының ЖСҚ құжаттары сараптамаға тапсыру жөніндегі жұмыстар алып барылуда. «Ақбұлақ» бағдарламасы аясында елді мекендерді ауыз сумен қамтамасыз ету үшін Бірлік, Жаңатіршілік, Үшағаш ауылдарына қажетті құжаттар ЖСҚ «ЖҚИ Қаз-Нұр» ЖШС тарапынан толығымен әзірленіп, мемлекеттік сараптамадан өткен. Құрылыс жұмыстарын жүргізуге қаржы бөлу үшін аудандық ТҮКШ бөлімі тарпынан облыстық ТҮКШ басқармасына тапсырылған. Жаңатіршілік елді мекені бойынша ауыз су құбырын тарту құрылысына (2018 жылы) жеңімпаз анықталып құрылыс жұмыстары жүргізілуде. Үшағаш елді мекені бойынша ауыз су құбырын тарту 2019 жылы конкурс өткізіліп жеңімпаз анықталған, құрылыс жұмыстары басталды. Бірлік елді мекендері бойынша ауыз су құбырын тарту құрылысына конкурс алдағы уақытта өткізілетін болады. «Бизнестің жол картасы 2020» бағдарламасы аясында елді мекендегі ішкі көшелерді жөндеу бойынша Бірлік ауылындағы Қажымұхан (300 м), Ә.Молдағұлова (1250 м), Ш.Уалиханов (315 м), Жаңатіршілік ауылындағы Д.Қонаев (900 м) көшелерін орта жөндеуден өткізуге сметалық құжаттары әзірленіп 2019 жылға асфальттау жоспарлануда. Сонымен қатар Бірлік ауылындағы А.Байтұрсынов (2750 м) және Жаңатіршілік ауылындағы Т.Белгібаев (5000 м) көшелеріне 2019 жылы тас төсеуге сметалық құжаттар әзірленген. Бүгінгі таңға Бірлік елді мекені М.Маметов көшесіне (L-1260) тас төселді. Аудан әкімі кездесу соңында тиісті сала басшылары мен округ әкіміне ауылдық округ аумағын көгалдандыру бойынша жұмыстарды жандандыруға, сондай-ақ аудан прокуроры округ аумағында қылмыстың алдын алу бойынша атқарылған жұмыстар жайында тиісті сұрақтарын қойып, тапсырмалар жүктеді.
