Бүгін киелі мекен Түлкібас ауданына ҚР «Қазақстан мұсылмандары діни басқармасы» Республикалық ислами діни бірлестігінің Төрағасы, Бас мүфти Наурызбай қажы Тағанұлы ресми сапарымен келді, деп жазады Түлкібас ауданы әкімінің баспасөз қызметіне сілтеме жасаған didarbek.kz.
Бас мүфтидің қатысуымен өткен кездесуге Қазақстан мұсылмандар діни бірлестігінің Түркістан облысы бойынша өкілі, «Қожа Ахмет Яссауи» мешітіннің бас имамы Мұсабек Ақтамберді, аудандық мәслихат хатшысы және депутаттар, ардагерлер кеңесі, қоғамдық кеңес, дербес бөлім басшылары, имамдар және БАҚ өкілдері қатысты. Жиынды жүргізіп отырған аудан әкімі Н.Ә.Тұрашбеков, Наурызбай қажы Тағанұлын Бас мүфти болып сайлануымен шын жүректен құттықтап, басқарып отырған діни басқарма қызметкерлеріне ұлттар мен ұлыстарды мейірімділікке, игілікке, бірлікке баулу жолында рухани табыс тіледі.
Киелі Түлкібас топырағынан түлеп ұшқан абзал азаматтың бірі Наурызбай қажы өз сөзінде, жырақтағы жерлестерінің жетістіктерін әрдайым мақтан ететінін және пейілі таза, көңілі дархан, қолы жомарт халықтың арасында өскенін мақтан тұтатынымен қуана бөлісті. Бас мүфтиден кейін мінбеге шыққан аудандық ардагерлер кеңесінің төрағасы Қасымбек Сәтпай Нұрлыбекұлы, аудандық қоғамдық кеңес төрағасы Маткеримов Өтепбай Амалбекұлы, Ақбиік ауылдық округінің имамы Алдашев Ермахамбетов сияқты ауданымыздың зиялы қауым өкілдері Бас мүфти Наурызбай қажы Тағанұлының алдағы істеріне табыс тілеп, ізгі тілектерін білдірді.
Тұрғындар тарапынанда бірнеше азаматтар сөз алып, өз ұсыныс-тілектерін жеткізді. Кездесуді аудандық ардагерлер кеңесінің мүшесі Аманбай Абдалимов қорытындылап, барша жиналған қауымға ақ батасын берді.
