Апта бұрын Түркістан қаласындағы тұрғын үйдің бірі тілсіз жаудан өртке оранғанын және дер кезінде төтенше жағдайлар қызметкерлері ауыздықтағаны жөнінде БАҚ құралдарында жазылған болатын.
⠀
Осындай өрттің арасында қалған отбасының қызы мен екі немересін аман алып қалған Ғазиз Серікбайұлын шаһар басшысы Рашид Аюпов қабылдауына шақырып, алғыс хат тапсырды.
⠀
«Сізді «Бүгінгі күннің батыры» деп атаудың жөн екенін көріп отырмын. Өрт — тілсіз жау. Осындай беймезгіл уақытта орын алған, бір отбасына төнген қауіпті жағдайда кішкентай балаларға алаңдаушылық танытып, өмірін сақтап қалғаныңыз — нағыз қаһармандық! Жанашыр көрші екендігіңізді көрсетіп, отбасындағы балаларды өрттен аман алып қалған Сіздің бұл ісіңіз мақтауға тұрарлық! Сіздей ерік-жігерлі, қайратты, өр намысты жерлестеріміздің барына қуаныштымын!» дей келе, жеңісті де жемісті күндер тіледі.
⠀
Айта кетейік, бұл отбасындағы жағдайға жергілікті билік пен «Asar» еріктілер ұйымы көмек көрсетеді. Қабырғасы қаланған жаздық үйінің іргесін қалауға қажетті жабдықтар әперу жіті назарда.
