Шымкент қаласында ҰБТ өтетін жоғары оқу орындарының дайындығы пысықталуда.
Шымкентте Ұлттық бірыңғай тестілеу 20 маусым мен 5 шілде аралығында санитарлық талаптарды қатаң сақтай отырып, қаладағы үш жоғары оқу орнының базасында өтеді. Шымкент қаласы білім басқармасының мәліметінше, тестілеуге 8 570 түлек қатысады деп күтілуде.
ҰБТ өтетін жоғары оқу орындарының бірі — М.Әуезов атындағы ОҚМУ базасы. Шымкент қаласы әкімінің орынбасары Алмасбек Мамытбеков, Шымкент қаласы білім басқармасының басшысы Жанат Тәжиева университет базасында Ұлттық бірыңғай тестілеу өткізуді ұйымдастыру бойынша дайындық жұмыстарының барысымен танысып шықты. Қазіргі таңдағы карантин ережелеріне байланысты санитариялық — эпидемиологиялық талаптарды сақтаудың маңыздылығы сөз болды.
М.Әуезов атындағы ОҚМУ ректоры Дария Қожамжарова 10 аудиторияның санитариялық — эпидемиологиялық талаптарға сай екендігін жеткізді.
Сонымен қатар, ҰБТ өткізу пункттерінде қоғамдық тәртіптің, көлік қозғалысының, медицианалық жедел жәрдем, өрт сөндіру және ақпараттық түсіндірме жұмыстарының сапалы жүргізілуі және санитарлық нормалардың қатаң сақталуын бақылау тапсырылды.
© DIDARBEK.kz
