Шымкент қаласында «Жастар практикасы» бағдарламасы арқылы жастарды жұмыспен қамту белсенді жүргізіліп жатыр. Бұл бағдарлама көптеген жастардың жұмыс табуына, сондай-ақ, тәжірибе жинауына зор мүмкіндік болып отыр, деп жазады қалалық ақпараттық — коммуникациялық орталығына сілтеме жасаған Didarbek.kz ақпараттық агенттігі.
Атап айтар болсақ, шымкенттік жас маман Сандуғаш Жапек бағдарлама аясында №24 “Алма” бөбекжай — балабақшасында мейірбике болып жұмыс істеп жүр. Ол Түркістан медицина колледжінің түлегі. Арнаулы орта оқу орнын “Мейіргер ісі” мамандығы бойынша бітірген.
— Оқуды тәмамдаған соң бірден “Жастар практикасы” бағдарламасына қатысуға бел буып қалалық халықты жұмыспен қамту орталығына бардым. Жұмыссыз жас ретінде тіркеліп, қажетті құжаттарды өткіздім. Көп ұзамай маған бөбекжай — балабақшасына жолдама берді. Жұмысым жақсы. Балалардың, қажет болса қызметкерлердің денсаулығын қадағалаймын. Алғашқы ем — домын жасаймын. Болашақта емханада жұмыс жасап, қала тұрғындарының денсаулығын жақсартуға үлес қосқым келеді, — дейді жас маман Сандуғаш Жапек.
Сонымен қатар, жалпы Шымкент қаласында ағымдағы жылы аталған бағдарлама аясында 2000-нан астам жасқа жұмыс орындарына жолдама беру жоспарланған. Жыл басынан бері 1000-нан астам жас жолданып, олар мемлекеттік және жекеменшік мекемелерде жұмыс істеп жүр.
Айта кету керек, «Жастар практикасына» «Халықты жұмыспен қамту туралы» Қазақстан Республикасының Заңына сәйкес білім беру ұйымдарын алдыңғы 3 жыл ішінде бітірген және 29 жастан аспаған жұмыссыз түлектер жастар практикасына қатыса алады. Мерзімі — 12 ай, жалақысы 30 АЕК.
Құрметті жастар! Егерде жұмыс іздеп жүрген болсаңыздар, Халықты жұмыспен қамту орталығына келсеңіздер болады. Онда түрлі бағдарламалар қарастырылған. Сондай-ақ, тұрақты түрде бос жұмыс орындарының жәрмеңкелері ұйымдастырылып отырады.
