Халықаралық әйелдер күні мен Ұлыстың ұлы күні – Наурыз мерекесіне орай Шымкент қалалық А.Пушкин атындағы әмбебап кітапханасының ұйымдастыруымен «Ұлттық киім — халық қазынасы» атты іс-шарасы өтті. Ұлыстың ұлы күні қарсаңында қазақ халқының мәдениетін дәріптеу мақсатында кітапхана қызметкерлерінің ұйымдастыруымен өткен салт-дәстүрлерге негізделген жиында бойжеткендер мен аналарға ұлттық нақыштағы заманауи киім үлгілері дәріптелді.
Қазақ халқының қолөнері — ел тарихымен қатар дамып, өркендеп келе жатқан халық қазынасы.
Ал, қолөнердің айшықты бөлігі — ұлттық киімдер. Ұлттық киімдердің тарихы, тігілу техникасы өте ерекше.
— «Ұлттық киім — халық қазынасы» іс-шарасы арқылы қазақтың ұлттық киімдерін өскелең ұрпаққа насихаттауды мақсат етіп отырмыз. Бүгінгі жиын «Наурыз Шымкенттен басталады» деген ұғымның дәлелі десем де болады. Халықаралық әйелдер күні қарсаңында кітапханада арнайы көркемсурет көрмесі ұйымдастырылса, Ұлыстың ұлы күніне орай ұлттық киімді насихаттап отырмыз. Ұлттық киімдерді дәріптеп, құрметпен қарау және оны күнделікті кию — әрбір өскелең ұрпақтың парызы. Себебі, ұлттық киім қазақ халқының тарихынан, әдет-ғұрпы мен салт-дәстүрінен, мәдениетінен сыр шертеді, — дейді А.Пушкин атындағы әмбебап кітапхана әдіскері Раушан Теңлібаева.
Жиынға Қазақстан Республикасы Мәдениетінің қайраткері, драматург Сая Қасымбек, жеке кәсіпкер, «A.Gulmira collection» брендінің негізін қалаушы Гүлмира Аманжолова, «Аналар» журналының редакторы Ажар Момбек, Ә.Қастеев атындағы өнер және дизайн колледжі мен №5 техникалық колледж оқытушылары мен студенттері қатысты.
Жиын барысында «А.Gulmira collection» брендінің ұлттық киімдер топтамасы мен аталмыш колледж студенттерінің жұмысы көрсетілді.
