Өтеева Сара Абдрахманқызы 2000 жылдан бері Кентау қаласының «Ю. Гагарин атындағы №16 мектеп-лицейі» коммуналдық мемлекеттік мекемесінде еңбек етіп келеді. Ұстаз! Осынау қастерлі де қасиетті атқа лайық мамандар көп болса, Қазақ елінің болашағы жарқын.
Тек, ұлтым деген ұстаздар шәкірт санасына білім мен тәрбиенің нәрін құйса ғана келешегіміз кемел. Иә, кәсіби білікті, нағыз ұлтжанды ұстаздар ғана намысшыл ұрпақ, білімді оқушы тәрбиелесе, ол – мемлекетшіл тұлға қалыптастырудың алғышарты. Өзгелерге үлгі бола білген, тәжірибелі ұстаз, мықты маман Сара Өтеева талай білімді шәкірт тәрбиелеп келе жатқан тәжірибелі ұстаз.Ұзақ жылдар бойы аталған мектепте қазақ тілі мен әдебиеті кабинетінің меңгерушісі қызметін атқарды. Сол жылдар Сара Абдрахманқызы үшін әдістемелік жағынан нағыз шыңдалу мектебі болды. Қала көлемінде бірнеше рет ашық сабақтар өткізіп, ерекше көзге түсіп, қалалық және облыстық сайыстарда жүлделі орындар иеленді, семинар, конференцияларда баяндамалар жасады. Сара Абдрахманқызы руханият жанашыры, ұлағатты ұстаз, парасатты педагог, майталман маман ретінде өз ортасында беделді ұстаз.
Ұстаздың осы күнге дейін жеткен жетістіктері мен табыстары да аз емес. Атап айтар болсақ, қала көлемінде ұйымдастырылған «Өнерлі ұстаз», «Қанеки, тілім, сөйлеші» байқауларының жеңімпазы атанды. 2009 жылы «Үздік мұғалім-2009» сайысында І орын иеленсе, сол жылы «Майталман ұстаз» атанып, қала әкімі К.Табылдиевтің, 2012 жылы қала әкімі Б.Байсаловтың алғыс хаттарымен марапатталды. 2010 жылғы «Ең үздік пән кабинеті» қалалық және облыстық байқауларының жеңімпазы атанса, 2013 жылы елордада өткен Қазақстан Республикасы филологтарының І съезінің делегаты. 2015 жылы ҚР Білім және Ғылым Министрлігі, ОҚО білім, жастар саясаты және тілдерді дамыту басқармасының құрмет грамотасымен, 2017 жылы ҚР Әділет Министрлігінің және «Қазақстан ұстаздары» қоғамының алғыс хаттарымен марапатталды. 2019 жылы «Мінсіз қызметі үшін» медалінің иегері. Жыл сайын дәстүрлі түрде өтіп тұратын оқушылар арасындағы мәнерлеп оқу, мүшәйра, көркем сөз оқу байқауларына шәкірттерді дайындап, олар жүлделі орындарды иеленіп, жоғары нәтижелерге қол жеткізуде. Балалардың бойына туған тіл мен төл әдебиетіміздің нәрін сіңіруде ұстаз түрлі шығармашылық ізденістерге барады. Соның бірі жуырда қаламызда өткен «Ұлт көсемі Ахмет Байтұрсынұлының «Қазақ әліппесі – білімпаз ұрпақ үшін мирас» тақырыбындағы ақындар байқауы. Облыс көлемінде ұстаздар қатысқан байқау шарты бойынша қатысушылардың өлеңдері алдын-ала дайындалып келгені есептелмей, қосымша тағы да 10 минут уақыт беріліп, ақындардың табанда, жолма-жол өлең құрастыру қабілеті сынға түскен еді. Сол байқауда Ұлт ұстазына арнап:
Ұстаз болдың ұлтыңа жаның сүйіп,
Қиянаттың отына жаттың күйіп;
Мақсат – айқын, бағытың – түзу,
Оқу-білім санамызға жеткізу, деген жыр жолдары төгіле кеткен-ді. Риясыз көңілден шыққан жыр жолдарына әріптестері де қуана қол соғып жатты.
Сара Абдрахманқызы саналы ұрпаққа сапалы білім беруде қажымай еңбек етіп қана қоймай, шәкірт бойына адамгершілік, ізгілік, елжандылық қасиеттерді сіңіре білген ұлағатты ұстаз. Ол ұстаздық жолында оқушылардың бойына ұлттық сана, дәстүр тағылымы, ана тілінің қайнар көзі бай да көркем әдебиетіміздің айшықты үлгілерін сіңіруде қажымай, талмай еңбектеніп келеді.
А.ӘЛІПБАЙ,
Қ.А. Ясауи атындағы ХҚТУ студенті.
