Шымкент қаласы үшін экология мәселесі стратегиялық басымдықтардың бірі болып табылады. Қала аумағында тәулігіне шамамен 1000 тонна тұрмыстық қалдық жиналатыны қоршаған ортаға түсетін жүктемені елеулі түрде арттырады. Осыған байланысты қалдықтарды басқарудың тиімді жүйесін енгізу, экологиялық ахуалды жақсарту және заманауи технологияларды қолдану бағытында жүйелі шаралар қолға алынған, — деп хабарлайды Didarbek.kz тілшісі Шымкент қаласы әкімдігінің баспасөз-қызметіне сілтеме жасап.
Аталған бастамалардың бірі ретінде 2025–2027 жылдар аралығында қалдықтарды жағу арқылы энергия өндіретін зауыт салу жөніндегі 100 млн долларлық инвестициялық келісім жасалды. Бұл зауыт іске қосылған кезде қаланың экологиялық жағдайы айтарлықтай жақсарып қана қоймай, 70 тұрақты жұмыс орны ашылады. Жобаның жүзеге асуы қалдықтарды өңдеудің жаңа стандарттарын енгізуге, энергия тиімділігін арттыруға және қаланың таза қала статусын нығайтуға мүмкіндік береді.
Сонымен қатар, мемлекеттік-жекешелік әріптестік аясында қалдықтарды жинау және сұрыптау жүйесін жаңғырту жобасы іске асырылуда. «Clean Village» компаниясы жылына 300 мың тонна қалдықты өңдеуге қабілетті желіні орнатып, 200 жартылай жерасты контейнерін, 900 толым датчик пен 50 бейнебақылау камерасын орналастырады. Сонымен бірге, қалдықтарды тасымалдауға арналған 60 арнайы техника планшеттермен жабдықталып, бүкіл процесс толықтай цифрландырылып, мониторинг жүйесі енгізіледі. Бұл қалдықтарды уақытылы жинауға, өңдеуге және қайта пайдалануға жол ашып, адам факторын барынша азайтады.
Сонымен бірге, қалада экологиялық мәдениетті арттыруға бағытталған қосымша шаралар жүргізілуде. Жергілікті мектептер мен университеттерде экология және қалдықтарды дұрыс басқару бойынша ақпараттық-түсіндіру жұмыстарын ұйымдастыру жоспарланған. Қалалық саябақтар мен қоғамдық орындарда қоқыс бөлетін арнайы контейнерлер мен ақпараттық стендтер орнатылып, тұрғындардың экологиялық жауапкершілігі қалыптасады.
Барлық аталған жобалар мен бастамалар мегаполистің экологиялық қауіпсіздігін арттырып қана қоймай, Шымкентті таза, жасыл, әрі өмір сүруге қолайлы қалаға айналдыруға елеулі үлес қосады. Сонымен қатар, бұл шаралар қала тұрғындарының өмір сапасын жақсартып, экологиялық туризмді дамытуға мүмкіндік бермек.
© Didarbek.kz
