«Біз әрбір тұрғын үйді тұрақты бақылауға алдық. Тіпті терезенің әйнегі сынған болса да, жөндеуге мұқтаж тұрғын үй нысаны ретінде тіркеуге алдық». Осылай деген ҚР-ның индустрия және инфрақұрылымдық даму бірінші вице-министрі Қайырбек Өскенбаев бүгін Арыс қаласындағы әрбір сектор жұмысын журналистер қауымына таныстырды. Атқарылып жатқан шаруалармен бөлісті.
Бұл туралы облыстық «On’tu’stik» телеарнасының тілшісі Н.Мұхамеджанұлының материалына сілтеме жасаған «didarbek.kz» хабарлайды.
Ұйымдастырылған пресс-турда вице-министр тікелей өз бақылауына алған тұрғын үйлер мен әлеуметтік нысандардың жай — күйімен таныстырды. Қираған баспаналардың қазіргі ретке келген жағдайын көрсетті. Бүгінгі таңда аталмыш министрлік барлық жөндеу жұмыстарына атсалысып, материалдық базаны қамтамасыз ету үшін, өзара қарым-қатынас логистикасын құруда.
Қазіргі таңда тексеріс нәтижесі бойынша қаладағы үйлердің 85%- ы жөндеуді қажет етеді. Оларды қайта қалпына келтіру бойынша тиісті 17 сектор мүшелері жүктелген міндетті уақытында аяқтауға уәде беріп отыр. Соңғы мәлімет бойынша қалада 1047 үй толық қалпына келтіріліп, құрылыс жұмыстары аяқталған. Тағы 4225 жеке тұрғын үй мен әлеуметтік нысандарда құрылыс қарқынды жүріп жатыр.
Тұрғын үйінің құрылысы аяқталып, жайлы баспанасына жайғасқан Гүлнар Ибрагимова сала жауаптыларына айтар алғысы шексіз. Себебі, аз уақыттың ішінде күрделі жөндеу жұмысын жүргізіп, баспанасын қайта қалпына келтірген мердігерлер күндіз-түні тоқтаусыз еңбек еткен.
Қаланы қалпына келтіру үшін бес мың тоғыз жүзден астам жұмысшы тартылған. 17 секторда жалпы саны 194 құрылыс компаниясы, уақытпен санаспай еңбек етуде. 245 дана түрлі техника да осында. Барлығы да Елбасы мен Мемлекет басшысының тапсырмасына сәйкес 1 – тамызға дейін құрылыс жұмыстарын аяқтап, тапсыруға ниетті.
