Шымкент қаласында халықтың қауіпсіздігін қамтамасыз ету және төтенше жағдайлардың алдын алу мақсатында азаматтық қорғаныс бағытындағы жұмыстарға ерекше көңіл бөлінуде.
Азаматтық қорғаныс – халық пен аумақты зақымдаушы құралдардан және төтенше жағдайлардан қорғауға бағытталған жалпымемлекеттік іс-шаралар жүйесі. Бұл бағыттағы жұмыстарды қала әкімі басқарып, қалалық Төтенше жағдайлар департаменті жұмысшы орган ретінде жүзеге асырады.
Департамент азаматтық қорғаныс аясында халықты оқыту, қауіпсіздік мәдениетін қалыптастыру және төтенше жағдайлар кезінде дұрыс әрекет ету дағдыларын дамыту бағытында бірқатар іс-шараны атқаруда.
Жыл басынан бері Азаматтық қорғау саласындағы Ұлттық орталықта 24 адам, ал департамент базасында 1 200 тыңдаушы оқытылды. Сонымен қатар қала аумағында азаматтық қорғаныс бойынша түрлі тақырыпта 3 500-ге жуық оқу-жаттығу өткізілді.
Тұрғындардың төтенше жағдай кезіндегі іс-қимыл тәртібі туралы хабардарлығын арттыруға да басымдық берілген. Осы мақсатта қаладағы 2 500-ге жуық көпқабатты тұрғын үйдің 8 500-ге жуық кіреберісіне ақпараттық тақтайшалар орналастырылды. Олар төтенше жағдай туындаған кезде тұрғындардың қандай әрекет жасау керектігін түсіндіруге арналған.
Аталған шаралар халықтың қауіпсіздік жөніндегі сауаттылығын арттыруға, төтенше жағдайларға дайындық деңгейін нығайтуға және азаматтық қорғаныс жүйесінің тиімділігін қамтамасыз етуге бағытталған.
Сонымен қатар, қала аумағында төтенше жағдайлардың алдын алу және олардың ықтимал салдарын азайту бағытындағы жұмыстар жүйелі түрде жүргізілуде. Бұл ретте жауапты мекемелердің өзара іс-қимылын үйлестіруге және жедел әрекет ету тетіктерін жетілдіруге ерекше мән беріледі.
Азаматтық қорғаныс шараларының тиімділігін арттыруда тұрғындардың белсенділігі мен жауапкершілігі де маңызды рөл атқарады. Әрбір азаматтың қауіпсіздік талаптарын білуі және төтенше жағдай кезінде дұрыс әрекет етуі адам өмірін сақтап қалуға ықпал етеді.
Осы бағытта халық арасында түсіндіру жұмыстары жүргізіліп, қауіпсіздік ережелерін сақтау қажеттілігі тұрақты түрде насихатталуда. Әсіресе, балаларға, қарт адамдарға және ерекше қолдауды қажет ететін азаматтарға қауіпсіздік шараларын түсіндіруге баса назар аударылады.
Алдағы уақытта да Шымкент қаласында азаматтық қорғаныс жүйесін жетілдіру, халықтың қауіпсіздік мәдениетін қалыптастыру және төтенше жағдайлардың алдын алу бағытындағы жұмыстар жалғасын табады. Басты мақсат – тұрғындардың өмірі мен денсаулығын қорғап, қаладағы қауіпсіз ортаны қамтамасыз ету.
