Түркістан облысының аумағында 17 мен 21 қыркүйек аралығында жүргізілген «Қару» республикалық жедел-профилактикалық іс-шарасы барысында 64 дана заңсыз қару тәркіленген. Учаскелік инспекторлармен 7 мыңнан астам қару иелері тексеріліп, заңсыз қару сақтау ережелерін бұзғаны үшін 429 азаматқа қатысты әкімшілік хаттамалар толтырылыпты. Бұл туралы «aq-qara.kz» ақпараттық агенттігіне сілтеме жасаған didarbek.kz хабарлайды.
Қарумен жасалынатын қылмыстың алдын алу және заңсыз сақталған қаруды анықтау мақсатында ұйымдастырылған шараның 5 күнінде Түркістан облысының құқық қорғаушыларымен 2 ойық ұңғылы, 55 -аңшылық, 4 газды тапанша, 2 травматикалық және 1 электрлі қару алынды. Ауыл тұрғынынан тіркелмеген 16 калибрлі аңшылық қаруы және 2 оқ-дәрі тәркіленген. Ал, Мақтарал ауданында жергілікті тұрғыннан 1959 жылы шығарылған ТОЗ-8 карабині табылып отыр.
Айта кетейік, қазіргі таңда тәркіленген қаруларға тиісті сараптамалар тағайындалды. Барлық жайттар Қылмыстық кодекстің «Қаруды, оқ-дәрілерді заңсыз сақтау» бабы бойынша СДТБТ-не тіркеліп, сотқа дейінгі тергеу амалдары жүргізілуде.
