Есепті кездесулердің қорытынды күнінде Шымкент қаласының әкімі Ғабит Сыздықбеков Абай ауданының тұрғындарымен кездесті. Асар, Ынтымақ, Ынтымақ-2 және Жайлау шағынаудандарының тұрғындары өздерін толғандырған мәселелерді көтеріп, аумақтарды одан әрі дамыту бойынша ұсыныстарын білдірді.
Тұрғындар өтініштерінің арасында баспана кезегіне тұру, абоненттерді газға қосу, механикалық газ есептегіштерін электронды есептегіштерге ауыстыру, аулаларды абаттандыру және көгалдандыру мәселелері бар.
Сонымен қатар, қала тұрғындары мектептер, балабақшалар мен учаскелік полиция пункттерін салу қажеттігіне назар аударды. Мегаполис әкімі Асар шағынауданында Мәдениет үйін және №№89, 90 және 95 мектептеріне қосымша корпустар салу жоспарланғанын атап өтті. Сондай-ақ, Жаңаталап және Бозарық тұрғын алаптарында учаскелік полиция пункттері ашылады.
Кездесу барысында азаматтарды әлеуметтік қамсыздандыру, саябақтар мен гүлзарларды күтіп-ұстау, жолдарды кеңейту, кәріз желілерін жүргізу және қосу мәселелері деп қаралды.
Қала әкімі тұрғындардың барлық өтініші назар аударуды және одан әрі жұмыс істеуді қажет ететінін атап өтті. Кейбір мәселені шешу үшін қосымша қаржы, жобалық шешімдер мен уақыт қажет. Бұл бағыттағы жұмыс қолданыстағы заңнама талаптарын ескере отырып жалғасады.
Кездесуде көтерілген мәселелердің әрқайсысы тиісті сала мамандарымен бірлесіп зерделеніп, шешу жолдары айқындалады. Әсіресе әлеуметтік және инженерлік инфрақұрылымға қатысты ұсыныстар тұрғындардың күнделікті тұрмыс сапасын жақсартуға бағытталған.
Абай ауданындағы елді мекендердің дамуына байланысты инфрақұрылымды кезең-кезеңімен жаңарту, қоғамдық кеңістіктерді абаттандыру және тұрғындарға қолайлы жағдай жасау жұмыстары жалғасады. Бұл ретте жаңа нысандарды салу және қолданыстағы инфрақұрылымды жетілдіру мәселелеріне басымдық беріледі.
Тұрғындармен тікелей кездесулер жергілікті жердегі өзекті мәселелерді нақтылауға және олардың шешімін жеделдетуге мүмкіндік береді. Мұндай формат азаматтардың ұсыныстары мен пікірлерін ескеріп, атқарылып жатқан жұмыстардың тиімділігін арттыруға бағытталған.
Қала әкімдігі көтерілген мәселелердің орындалу барысын бақылауда ұстап, жауапты басқармалармен бірлесіп тиісті жұмыстарды жалғастырады. Негізгі мақсат – аудан тұрғындары үшін қауіпсіз, жайлы және қолайлы қалалық ортаны қалыптастыру.
Сонымен қатар, әкім қалалық ортаның жағдайы тек тиісті мекеме қызметтерінің жұмысына ғана емес, тұрғындардың өзіне де байланысты екенін атап өтті. Тазалық пен тәртіп әр адамның жеке жауапкершілігінен басталады.
