Мақтаарал ауданында орын алған төтенше жағдайға байланысты облыс әкімінің тапсырмасына сәйкес Келес ауданының әкімдігі Фердауси және Жантақсай елдімекендеріне жауапты болып бекітілді.
Аталған елді мекен тұрғындарының 400- ден аса азаматтары Мақтаарал ауданындағы №44 Ә.Науаии мектебіне эвакуацияланып, уақытша тұрғын орыны дайындалды. Төтенше жағдайдың алғашқы күніндегі ауыз ашарға 50 келі палау дайындалып, аталған мектептің спорт залына карантин режимін сақтай отырып, әр столға 4 азаматтан арақашықтығы 1 метрден жайғастырылып, тағам тартылды.
Сондай-ақ эвакуацияланған азаматтар Келес ауданы әкімдігінің ұйымдастыруымен төсек орынмен, демеушілер мен еріктілер есебінен азық-түлік және гигеналық заттармен қамтамасыз етілді.
Айта кетейік, 2020 жылғы 1-мамыр күні Өзбекстан Республикасындағы «Сордаба» су қоймасы бұзылып, Мақтаарал ауданындағы «ЦГК» каналына 300 миллион текше метр су келіп құйылған. Соның салдарынан Мақтаарал ауданында жергілікті деңгейдегі төтенше жағдай қалыптасып отыр. Сонымен қатар, облыс әкімі Өмірзақ Шөкеев апаттан зардап шеккен аймаққа арнайы келіп, Арыстың тәжірибесіне сәйкес Мақтаарал ауданында да тиісті жұмыстар жүргізілетінін айтты.
