Шымкент қаласында жол инфрақұрылымын дамыту және көлік қозғалысын жақсарту мақсатында бірқатар құрылыс жобасы жүзеге асырылуда. Қала аумағындағы негізгі магистральдарды жаңғырту, жаңа жол бағыттарын қалыптастыру және жолайрықтарды салу жұмыстары көлік қатынасын оңтайландыруға бағытталған.
Шымкент қаласының әкімі Ғабит Сыздықбеков қаланы аралау барысында Тұран ауданындағы А-2 автомобиль жолын қайта жаңғырту жұмыстарының барысымен танысты. Ұзындығы 6,2 шақырымды құрайтын бесінші кезең аясында жолдың бір жағындағы көлік қозғалысы ашылды. Екінші жағындағы қозғалысты келесі аптада іске қосу жоспарланған. Учаскеге бағдаршамдар мен қажетті жол белгілері орнатылады.
Жоба толық аяқталғаннан кейін жол алты жолақты жалпы қалалық маңызы бар магистральға айналады. Бұл көлік өткізу қабілетін арттырып, жол жүктемесін азайтуға және қозғалыс қауіпсіздігін жақсартуға мүмкіндік береді.
Бұдан кейін қала әкімі Әл-Фараби ауданында Қонаев даңғылының жалғасын салу жұмыстарының V кезеңін, сондай-ақ Бәйдібек би даңғылы мен Төлеметов көшесінің қиылысындағы көлік айрығының төменгі деңгейінде айналма қозғалысты ұйымдастыру, оңға бұрылатын жолдар мен жерасты жаяу жүргіншілер өткелдерін салу барысын тексерді.
Қаратау ауданында Ақсүмбе көшесін ұзарту жұмыстарының барысымен танысты. Жоба Бәйдібек би даңғылындағы көлік жүктемесін азайтып, жүргізушілерге қолайлы қатынас бағыттарын қалыптастыруға ықпал етеді.
Сонымен қатар Тіленшин көшесіндегі автомобиль жолы өтпежолында оңға бұрылатын жолдарды салу жұмыстары қаралды.
Қала әкімі Жолаушылар көлігі және автомобиль жолдары басқармасына барлық нысандағы құрылыс жұмыстарын бекітілген кестеге сәйкес жүргізіп, белгіленген мерзімде аяқтауды тапсырды.
Жол құрылысы барысында қозғалыс қауіпсіздігін қамтамасыз етуге, жол белгілерін орнатуға және жаяу жүргіншілерге қолайлы жағдай жасауға ерекше мән беріледі. Бұл талаптардың сақталуы жол-көлік оқиғаларының алдын алуға және көлік қозғалысын тиімді ұйымдастыруға мүмкіндік береді.
Сонымен қатар, құрылыс жұмыстарының сапалы орындалуы мен белгіленген мерзімде аяқталуы маңызды. Жауапты басқармалар мен мердігер ұйымдар жұмыстың әр кезеңінде техникалық талаптардың сақталуын қамтамасыз етіп, туындаған мәселелерді уақытылы шешуі қажет.
Жол желісін жетілдіру қаланың көлік жүйесін кешенді дамытуға ықпал етеді. Жаңартылған инфрақұрылым тұрғындардың күнделікті қатынауын жеңілдетіп, шаһардың түрлі бөліктері арасындағы байланысты нығайтуға негіз болады.
