28 сәуір – Дүниежүзілік еңбекті қорғау күні. Бүгін Шымкент қаласында айтулы күнге орай әлеуметтік әріптестік және еңбек қатынастарын реттеу жөнінде комиссия отырысы өтті. Жиынға қала әкімінің орынбасары Ергешбек Нұрсадық, өндірістік кәсіпорын басшылары, кәсіподақ ұйымдарының жетекшілері және әр түрлі саланың қызметкерлері қатысты.
Комиссия отырысында кәсіпорындарда жұмысшылардың әлеуметтік, еңбек қатынастары және өндірістік жарақаттарды болдырмаудың тиімді әдіс-тәсілдері талқыланды. Алқалы жиында сөз алған қала әкімінің орынбасары Е.Нұрсадық еңбек қатынастарын қолдануда озық болған кәсіпорындар өзге өнідіріс орындарымен тәжірибе алмасуы қажет екенін алға тартты.
–Әр қызметкер — өз саласының ең басты байлығы. Халықаралық еңбек ұйымының мәліметі бойынша, жыл сайын дүние жүзінде 270 млн еңбеккер өндірісте зардап шегеді. Оның ішінде 2,3 млн жұмысшы жұмыс орындарында немесе кәсіби аурулардың салдарынан қаза болады екен. Ал, Шымкент қаласында орналасқан мекемелер мен кәсіпорындарда 2022 жылы жазатайым оқиғалардан 47 адам жапа шекті, оның 8-і қазаға ұшырады. Биыл жыл басынан бері оқыс оқиғадан 6 адам зардап шекті, 2 жұмысшы қайтыс болды. Жұмысшылардың қауіпсіздігі қашанда біздің қызметіміздің басым бөлігі. Сондықтан қаладағы кәсіпорындар өзге әріптестерімен жиі тәжірибе алмасып, еңбек қатынастары, жұмысшылардың қауіпсіздігін қамтамасыз ету бойынша тиімді тісілдерімен бөлісіп отыруы керек, — деді қала әкімінің орынбасары.
Биылғы еңбекті қорғау күніне орай, қаладағы мекемелер мен кәсіпорындарда «Еңбек жолы» байқауы ұйымдастырылып, онда «Үздік еңбекті қорғау инженері» «Үздік қауіпсіз кәсіпорын» және «Үздік еңбекті қоғау қызметі» атты номинациялар бойынша үздіктер марапатталды.
«28 сәуір – Дүниежүзілік еңбекті қорғау күніне» орай ұйымдастырылған арнайы конкурсқа қала аумағындағы 51 кәсіпорын қатысып, комиссия қорытындысы бойынша жеңімпаздар іріктелді. Конкурс нәтижесі бойынша 3 номинация бойынша 9 адам марапатталып, 1 кәсіпорынға «Сенім сертификаты» табысталды.
Күн тәртібіндегі екінші мәселе бойынша Шымкент қаласының мемлекеттік еңбек инспекциясы басқармасының басшысы Бауыржан Қалжанов Әлеуметтік әріптестік пен әлеуметтік және еңбек қатынастарын реттеу бойынша комиссия мүшелерінің құрамына өзгерістер енгізу және 2023 жылы Еңбек күнін мерекелеу мен «Еңбек жолы» конкурсын Шымкент қаласында ұйымдастыру жөніндегі іс-шаралар жоспарын бекіту жайлы баяндап өтті.
Жиында келесі мәселе бойынша сөз кезегін алған «BI Group» құрылыс холдингінің Шымкент-Түркістан өңірлері бойынша Техника қауіпсіздігі және еңбекті қорғау қызметінің басшысы Қасым Алдабергенов құрылыс саласында орын алатын еңбек қауіпсіздігі және еңбекті қорғау талаптарының бұзылуы, жұмыс өндірісінің қанағаттанғысыз ұйымдастырылуы, жұмыс орындарын ұйымдастырудағы кемшіліктер, жеке және ұжымдық қорғаныс құралдарының қамтамасыз етілмеуі немесе қолданылмауы, қызметкерлерді еңбек қауіпсіздігін оқытудағы кемшіліктер, еңбек және өндірістік тәртіптің бұзылуы және алдын алу шаралары туралы айтып өтті.
Отырыста одан өзге, «Petro Kazakhstan Oil Product» жауапкершілігі шектеулі серіктестігінің Еңбекті қорғау бойынша Техникалық басшысы Ерлан Базаркулов компания тарапынан жүмыскерлерінің қауіпсіздігі үшін жасалынып жатқан шаралар, еңбек қауіпсіздігі мен еңбекті қорғауды ұйымдастыру саласында сақталып жатқан әрекеттер туралы баяндап өтті.
