Түркістан облыстық білім басқармасына қарасты аудандық білім бөлімдерінде бүгін бірқатар ісшаралар ұйымдастырылды. Атап айтқанда:
ЖАПОН МЕМЛЕКЕТІНЕ ТӘЖІРИБЕ АЛМАСУҒА КЕТКЕН ҰСТАЗДАРДЫҢ АЛҒАШҚЫ ЛЕГІ КЕЛДІ
Жапон мемлекетінің білім беру саласындағы Саяси Зерттеулер Ұлттық Институтының қолдауымен «Мұғалім тәжірибесіндегі сабақты зерттеу (Lesson Study)» шетелдік семинары өз жұмысын аяқталды.
Іс-сапардың екінші кезеңінде Түркістан облысының педагогтері сабақты зерттеу National Institute for Educational Policy Research (білім беру саласындағы Саяси Зерттеулер Ұлттық Институты) білім беру саласының ғылыми қызметкері, профессор Тошия Чичибудың Lesson Study әдісінің мақсатын, артықшылығын, оны оқу үдерісінде пайдаланудың тиімділігін, сондай-ақ аталған тәсілді кезең-кезеңмен іске асыру бойынша дәріс алды.
Yokohama қаласының Tobe бастауыш мектебінің зерттеу сабақтарына қатысты. Жапония мұғалімдерінің сабақ өткізуі мен ізденісі, олардың өз мамандығына деген адалдығы, еңбекқорлығы, елдік санада тәрбие беруі кәсіби қалыптасқан. Аталған семинар барысында делегаттар көптеген мәлімет алды.
Бір аптаға жалғасқан семинар cоңында делегаттарға National Institute for Educational Policy Research (білім беру саласындағы Саяси Зерттеулер Ұлттық Институты) білім беру саласының халықаралық сертификаты табысталды.
Облыс әкімінің тікелей қолдауымен орындалып жатқан білім саласындағы халықаралық іс-сапар жоғары деңгейде өтті.
ОҚУШЫЛАР МҮСІН ЖАСАУ ТЕХНОЛОГИЯСЫН ИГЕРУДЕ
Отырар ауданы, П.Айтменов атындағы негізгі орта мектебінде көркем еңбек пәнінің мұғалімі Арапбаева Бибізаттың жетекшілігімен үйірме оқушылары гипс материалынан мүсін жасау өнерін игеруде.
Үйірме сабағы барысында оқушыларға мүсін өнері туралы түсінік бере отырып, практика жүзінде түрлі жануарлардың мүсіндерін жасап, дайындалған қалыптарға гипстен жасалған қоспа құйылып, кептіріледі. Дайын болған бұйымның сырты тегістеліп, талғамға қарай акварельмен боялады.
Оқушылардың үйірме сабағында жасаған бұйымдары мен шығармашылығын насихаттау, бос уақытын тиімді ұйымдастыру және шығармашылық ой-өрісін дамыту мақсатындағы бұл үйірменің балаларға үйретері көп-ақ.
КЕЛЕСТІК ОҚУШЫЛАР МАХАМБЕТ ШЫҒАРМАЛАРЫ БОЙЫНША 30-ҒА ЖУЫҚ ИЛЛЮСТРАЦИЯЛЫҚ СУРЕТ САЛДЫ
Келес ауданында өткен «Махамбет оқулары» байқауында 30-ға жуық оқушы ақын шығармаларының желісімен иллюстрациялық суреттер салды. Сонымен қатар батыр жырларын жатқа оқып, ақындық қабілеттерін шыңдап, күмбірлете күй шертті.
— Конкурс жоғары сынып оқушылары арасында жыл сайын дәстүрлі түрде ұйымдастырылып келеді. Аудандық байқау жеңімпаздары облыстық кезеңге жолдама жеңіп алды. Махамбет мұрасы – егемен еліміздің өшпес рухы сияқты жастарға қашан да шамшырақ болары сөзсіз. Сондықтан мүндай байқаулардың маңызы зор деп ойлаймыз. Жыл сайын қатысушылар саны да артып келе жатқаны қуантады,-дейді байқау ұйымдастырушысы білім бөлімінің әдіскері Ляззат Пернеғалиқызы.
Аталған байқауға биыл ауданымыздың 50-ге жуық мектептерінен дарынды оқушылар қатысты.
МЕНТАЛЬДЫ АРИФМЕТИКАДАН ХАЛАҚАРАЛЫҚ САЙЫСТА ЖҮЛДЕЛІ ОРЫН АЛДЫ
Египетте ментальды арифметикадан өткен халықаралық сайыста жеті мемлекеттен келген оқушылар бақ сынады. Сайысқа Қазақстан, Ресей, Англия, Болгария, Қырғызстан, Иран елінен келген ойы ұшқыр, есептің шешімін жылдам таба алатын ең алғыр оқушылар қатысып, нәтижесінде «Достық» мектебінің математика пәнінің мұғалімі, халықаралық тренер атағының иегері Эльмира Суярбаеваның жетекшілігімен шәкірттері еліміздің көк туын Египет төрінде желбіретті.
Атап айтсақ, Ордабасы ауданына қарасты «Достық» жалпы орта мектебінің 2 сынып оқушысы Аллақұл Аяна бас жүлде, 6 сынып оқушысы Ерсеит Самат ІІ — орынды және «Ынтымақ» мектебінің 6 сынып оқушысы Алдаберген Аят І — орынды, «Нұрлыбеков мектебінің 3 сынып оқушысы Ералхан Нұрәлем ІІ — орынды иемденіп, ел алғысына бөленді.
МАХАМБЕТ ОҚУЛАРЫ ӨТТІ
Отырар ауданына қарасты Қ.Сәтбаев атындағы жалпы білім беретін мектеп базасында 2023 жылы 6 қараша күні Республикалық «Махамбет оқулары» конкурсының аудандық кезеңі өткізілді. Бұл конкурсқа білім беру ұйымдарының 8-11 сынып оқушылары арасынан 5 номинация бойынша аудан мектептерінен 89 оқушы қатысты.
Мектеп оқушылары арасында Махамбеттің ұлтына ұран болған рухы биік туындыларын насихаттау, шығармашылық қабілеттерін, эстетикалық талғамдарын дамыту, тарихи деректер бойынша тұжырым жасай білу дағдысына үйрету мақсатында өткізілген байқау 5 бағыт бойынша жүзеге асырылды.
1-номинация «Ұлы арман» — Махамбет шығармаларынан иллюстрациялық суреттер салу;
2- номинация «Ел құтқарар ер едім…» — Махамбет шығармаларын жатқа оқу;
3- номинация «Тартынбай сөйлер асылмын…» — жас ақындардың өз туындыларын мәнерлеп оқу конкурсы;
4- номинация «Шашақты найза, шалқар күй» — Махамбет күйлерін орындаушылар конкурсы;
5- номинация «Біз неткен ер, неткен ер? Сергелдеңмен өткен ер» — «Хандар мен ел билеушілер», «Батырлар» тақырыбының бірін қорғау бағыты бойынша сайысқа түсті.
