Шымкент қаласында сәуір айынан бері өткізіліп жатқан «Таза Қазақстан» экологиялық акциясы аясында үлкен жетістіктерге қол жеткізілді. Мемлекет басшысының тапсырмасына сәйкес ұйымдастырылған шараға 230 мыңға жуық тұрғын, 2301 өндірістік және кәсіпкерлік нысан, сондай-ақ 687 әлеуметтік мекеме қатысты.
Акция барысында 10 170 бірлік техника жұмылдырылып, 18 мың тоннадан астам тұрмыстық қалдық шығарылды. Бұл жұмыстарға күн сайын 2000-нан астам жұмысшы мен 150 арнайы техника тартылды. Қала тұрғындары, ардагерлер, зиялы қауым өкілдері, қоғам белсенділері мен ерікті жастар белсенді түрде атсалысты.
«Таза Қазақстан» акциясы қала тұрғындарының экологиялық мәдениетін қалыптастыруға бағытталған әрі жыл соңына дейін жалғастырылады. Сондай-ақ, 21 қыркүйекте әлем бойынша атап өтілетін “World Cleanup Day” акциясы республика көлемінде ұйымдастырылады. Ермахан Қозыбаев барлық азаматтарды акцияға белсене қатысуға және қоршаған орта тазалығына өз үлестеріңізді қосуға шақырды.
Экология департаменті 2024 жылы 52 мемлекеттік қызмет көрсетіп, I санаттағы объектілерге экологиялық рұқсат беруге ерекше назар аударды. Жыл басынан бері 7 экологиялық рұқсат беріліп, 6 өтініш кері қайтарылды. Сонымен қатар, қоршаған ортаға әсерді бағалау нәтижесінде 5 оң қорытынды берілді, ал 4 өтінішке бас тартылды.
2024 жылы департамент 94 объектіні тексеріп, 1 249 сынама алып, 7 585 талдау жүргізді. Ауаның, судың және топырақтың сапасы мұқият зерттелді. Әсіресе, қала арқылы өтетін Қошқар-Ата және Қарасу өзендеріндегі су сапасы нашарлаған. Қошқар-Ата өзенінде шекті рұқсат етілген ластаушы заттардың концентрациясы 1,5 есеге өскені анықталды.
Қаланың экологиялық жағдайын жақсарту мақсатында, полиция департаментімен бірлескен шаралар нәтижесінде, 125 автокөлік тексеріліп, 50 көлік ауаны нормадан тыс ластағаны үшін жауапкершілікке тартылған.
Департаменттің жұмысының басым бөлігін қала тұрғындарынан түскен арыз-шағымдар, әлеуметтік желідегі жарияланымдарды қарауға бағытталып отыр. Департамент басшысының аайтуынша арыз шағымдар негізінен тұрғын үйлер арасында мал ұстау, көршілердің қалдықтарды өртеуі, монша, темір қабылдау пунктері, түнгі мезгілде қала аумағында жағымсыз иістің шығуы, суды, топырақты ластау, өндіріс орындарының шамадан тыс ластап жатқандығы, қалдықтардың бей-берекет орналасуы, қоқыс контейнердегі және көше бойындағы қоқыстар уақытылы алынбауы, кәріз суларынан шыққан жағымсыз иістер бойынша түседі екен.
Айта кетейік, 21 қыркүйекте жыл сайын бүкіл әлемде “World Cleanup Day” акциясы өтеді. Акция республиканың барлық өңірлерінде өткізілетін болады.
Біз барлық азаматтарды акцияға белсенділік танытып, қоршаған орта тазалығы үшін өз үлестерін қосуға шақырамыз.
