Шымкент қаласының тұрғындарын сапалы интернетпен қамту бағытындағы жұмыс жүйелі жалғасуда. Қазіргі таңда мегаполис аумағын интернетпен қамту деңгейі 97%-ға жетіп, байланыс қызметтерінің қолжетімділігі мен сапасын арттыру бойынша нақты жобалар іске асырылуда.
Осы бағыттағы маңызды жобаның бірі – «Кар-Тел» ЖШС-мен бірлесіп жүзеге асырылып жатқан байланыс инфрақұрылымын дамыту жұмысы. Жоба аясында қала аумағында екі функциялы антенна-бағандық 22 құрылым орнату жоспарланған. Бұл тіректердің негізінде жаңа базалық станциялар іске қосылып, мобильді байланыс пен жоғары жылдамдықтағы интернет желісінің қамту аумағы кеңейтіледі.
Бүгінге дейін соның 9-ы орнатылып, жаңа базалық станциялар пайдалануға берілді. Соның нәтижесінде бұрын байланыс сапасы төмен немесе интернет жылдамдығы жеткіліксіз болған бірқатар тұрғын ауданда мобильді байланыс сапасы жақсарып, интернет желісінің тұрақтылығы мен жылдамдығы артты. Бұл тұрғындардың цифрлық қызметтерді кедергісіз пайдалануына, онлайн білім алуға, қашықтан жұмыс істеуге және мемлекеттік қызметтерді электронды форматта алуына қолайлы жағдай жасауда.
Жыл соңына дейін қалған 13 тіректі орнату және жаңа базалық станцияларды кезең-кезеңімен іске қосу жоспарланған. Жобаның толық жүзеге асуы нәтижесінде қала аумағын сапалы интернетпен қамтамасыз ету көрсеткіші айтарлықтай артып, байланыс инфрақұрылымы одан әрі нығая түседі. Бұл өз кезегінде Шымкент қаласының цифрлық даму қарқынын күшейтіп, тұрғындарға заманауи әрі сапалы телекоммуникациялық қызметтерді қолжетімді етуге мүмкіндік береді.
Сонымен қатар, байланыс инфрақұрылымын дамыту барысында тұрғындар санының өсуі, жаңа шағынаудандардың қалыптасуы және интернетке деген сұраныстың артуы ескерілуде. Бұл жұмыстар әсіресе байланыс сапасына сұраныс жоғары аумақтардағы желінің өткізу қабілетін арттыруға және цифрлық қызметтерді тұрақты пайдалануға мүмкіндік беретін жағдай қалыптастыруға бағытталған.
Қаланың шалғай және қарқынды дамып келе жатқан аумақтарында телекоммуникациялық инфрақұрылымды жетілдіру де назардан тыс қалмайды. Жаңа нысандарды іске қосу арқылы тұрғындардың ғана емес, кәсіпкерлік субъектілері мен әлеуметтік нысандардың да тұрақты байланыс қызметтерін пайдалану мүмкіндігі кеңейеді. Бұл қаланың барлық аумағында цифрлық мүмкіндіктерді тең дәрежеде дамытуға оң әсер етеді.
Алдағы кезеңде интернет сапасын тұрақты бақылау, инфрақұрылымды жаңарту және заманауи технологияларды енгізу жұмыстары жалғасын табады.
