Шымкентте 2026–2027 жылдардағы жылыту маусымына дайындық бекітілген іс-шаралар жоспарына сәйкес жүргізілуде. Дайындық жұмыстарын үйлестіру мақсатында арнайы штаб құрамы бекітіліп, жылу шаруашылығы нысандарын маусымға әзірлеу жұмыстары кезең-кезеңімен атқарылуда. Бұл туралы Өңірлік коммуникациялар қызметі ақпарат алаңында өткен брифинг барысында қалалық энергетика және инфрақұрылымды дамыту басқармасы басшысының орынбасары Азат Қайнарұлы мәлімдеді.
Қаладағы жылу желілерінің жалпы ұзындығы 838,6 шақырымды құрайды. Оның 152 шақырымы – магистральдық, 686,6 шақырымы – ішкі орамдық желілер. Жылу желілерінің 37 пайызы тозған. Сәуір айынан бастап магистральдық және ішкі орамдық желілерге гидравликалық сынақ жүргізіліп, нәтижесінде 135 ақау анықталған. Оның 108-і жойылды. Қалған 27 ақауды қалпына келтіру бойынша бекітілген кестеге сәйкес жөндеу жұмыстары жалғасуда.
Бүгінде қаладағы 31 дербес қазандықтың 29-ы, 17 сорғы станциясының 15-і және 2241 көпқабатты тұрғын үйдің 2134-і жылыту маусымына дайын. Ал 463 бюджеттік мекеменің барлығы қажетті дайындықтан өткен. Оның ішінде білім беру, денсаулық сақтау, спорт, мәдениет және жұмыспен қамту салаларындағы нысандар да бар.
Сонымен қатар, «3-Энергоорталық» АҚ-ның негізгі жабдықтарын алдағы жылыту маусымына дайындау жұмыстары жүргізілуде. Жылу желілерінің тозуын азайтып, апаттылық деңгейін төмендету мақсатында құбырішілік диагностика да қолға алынған. Жоспарланған жұмыс аясында қаланың жеті учаскесіндегі жалпы ұзындығы 5 шақырым, диаметрі 720 миллиметрге дейінгі магистральдық жылу желілері тексеріліп, диагностика жұмыстары толық аяқталды.
Жылу желілерінің техникалық жағдайын тұрақты бақылау алдағы кезеңде де жалғасып, анықталған ақауларды дер кезінде жоюға басымдық беріледі. Бұл жұмыстар жылу жүйесінің сенімділігін арттырып, маусым кезінде туындауы мүмкін техникалық мәселелердің алдын алуға бағытталған.
Сонымен бірге жылу инфрақұрылымын жаңғырту барысында тозығы жеткен учаскелерді кезең-кезеңімен ауыстыруға көңіл бөлінуде. Жөндеу жұмыстарының сапалы орындалуы желілердің қызмет ету мерзімін ұзартуға және жылу энергиясын тиімді жеткізуге мүмкіндік береді.
Алдағы жылыту кезеңінде әлеуметтік нысандар мен тұрғын үйлердің жылумен қамтылуы тұрақты бақылауда болады. Тиісті қызметтер нысандардың дайындығын пысықтап, маусымды қалыпты өткізуге қажетті шараларды уақтылы қабылдайды.
Жалпы, қаладағы жылу жүйелерін алдағы жылыту маусымына сапалы дайындау және тұрғындарды тұрақты жылумен қамтамасыз ету бағытындағы жұмыстар белгіленген жоспарға сәйкес жалғасуда.
