ҚМДБ-ның Түркістан қаласындағы кеңсе ғимаратында Қазақстан мұсылмандары діни басқармасы төрағасының бірінші орынбасары, найб мүфти Наурызбай қажы Өтпеновтың қатысуымен діни экстремизм мен терроризм мәселелері талқыланды, деп хабарлайды ҚМДБ-ның Түркістан облысы бойынша өкілдігінің баспасөз қызметіне сілтеме жасаған didаrbek.kz ақпараттық агенттігі.
Аталмыш жиынға Түркістан облысы Дін істері басқармасының басшысы міндетін атқарушы Батырбек Қаратайұлы Жалмұрзаев, облыстық «Дін мәселелерін зерттеу орталығының» басшысы Асылбек Ноғаев, Түркістан қаласының әкімінің орынбасары Ғани Құрмашұлы Рысбеков, Шымкент қаласы бойынша өкіл имам орынбасары Мұхамеджан Естеміров, Түркістан қалалық Ішкі саясат бөлімінің басшысы Бақытжан Кеңесбекұлы Бөкебаев, Сарыағаш ауданы Ішкі саясат бөлімінің басшысы Алдияр Қозыбаев, Келес ауданының Ішкі саясат бөлімінің басшысы Дәурен Оразбайұлы Илесов және қала, аудан имамдары қатысты.
Жиын барысында Сарыағаш, Келес, Сайрам аудандарындағы діни ахуалдар жайлы ішкі саясат басқармаларының өкілдерінің хабарламалары тыңдалды.
Мұнымен қатар, найб мүфти Наурызбай қажы Тағанұлы Түркістан облысына қарасты Келес, Сарыағаш және Сайрам аудандарында көп шоғырланған кереғар ағым мүшелерімен кешенді жұмыс атқару қажет екендігін атап өтті. Сондай-ақ, аталған бағыттарда өңірдегі проблемалық мәселелерге назар аударылып, оларды шешу жолдары бойынша тиісті орындармен бірлесіп кешенді іс-шаралар әзірлеуді тапсырды.
