ТҮЛКІБАС АУДАНЫ: Жанұзақ ауылдық клубына күрделі жөндеу жұмыстары жүргізілуде. Бұл туралы Түлкібас ауданы әкімінің баспасөз қызметіне сілтеме жасаған «didarbek.kz» ақпараттық агенттігі хабарлайды.
Түлкібас ауданының әкімі Н.Тұрашбековтың 2018 жылдың қорытындысымен халыққа есеп беру барысында ауыл тұрығындарынан біршама ұсыныстар түскен болатын.
Соның бірі Жаскешу ауылдық округіне қарасты Жанұзақ елді мекеніндегі ауылдық клубқа жөндеу жұмыстары жүргізілсе деген тұрғындардың өтініштері болатын. Бүгінде көпшіліктің ұсынысы аяқсыз қалмай, ауылдық клубқа күрделі жөндеу жұмыстары қарқынды жүруде. 100-ден аса адамға есептелген мәдени нысанның жөндеу жұмыстары мен қатар, аумағы толығымен қоршалып, абаттандырылмақ.
Елбасының «Болашаққа бағдар:рухани жаңғыру» бағдарламалық мақаласы аясында күрделі жөндеуден өтіп жатқан бұл нысан, аудан орталығынан шалғай жатқан 45 қана үйі бар Жанұзақ ауылының тұрғындары үшін қуанышты жаңалық. Өйткені бұл жерде ауыл жастары музыкалық және басқада да үйірмелерге қатысып, бос уақыттарын тиімді пайдаланумен өткізуге жағдай жасалынбақ.
Ауылдық клуб қыркүйек айында елді мекен тұрғындарына қызмет көрсете бастайды.
