Бүгін ҚР Премьер-Министрі Асқар Мамин облыс әкімі Өмірзақ Шөкеевпен бірге Түркістан облысы Мақтаарал ауданы Мырзакент кентінде ауыл тұрғындарымен кездесті. Онда эвакуацияланған мақтааралдықтардың алғашқы легі Әлішер Усмановтың қорынан бөлінген қор қаражатының сертификатын алды.
Бұл қаражат эвакуацияланған 5202 отбасының жеке шотына түседі. Қазіргі уақытта қаражат алатын барлық азаматтардың құжаттары қабылданып жатыр. Құжаттар толық жиналған кезде, әр отбасы өздеріне тиесілі қаржыны ала алады.
Ресей кәсіпкері Әлішер Усманов су тасқынынан зардап шеккен Мақтаарал ауданының эвакуацияланған тұрғындары үшін «Түркістан» әлеуметтік даму корпоративтік қорына 5,2 млн. АҚШ долларын аударған болатын. Бұл 2,3 млрд теңге 30 420 адамды құрайтын 5202 отбасының әрқайсына 422 мың теңгеден (1000 АҚШ доллары) үлестіріледі.
Ел басына күн туғанда жанашырлық танытып, қиналған жандарға демеу болатын, халықтың қайғы-қасіретін бөлісе аталатын азаматтар аз болса да бар екені көңіліңе жылулық сыйлайды. Дәл қазір Өзбекстанда жасамаса да, отансүйгіштік қасиеті бойынан кетпеген Алишер Усманов бүгін тағы да халықтың жанынан табылды. Сонымен қатар, Қазақстан Республикасының Түркістан облысы Мақтаарал ауданындағы жағдайға да бейжай қарамағаны қазақ пен өзбек халықтарының бір-біріне жанашыр, бауырлас халық екенін тағы бір дәлелдеді десек артық болмас.
© DIDARBEK.kz
