Түркістан облысы полицейлері жүгенсіз жүргізушіні жауапқа тартты, деп жазады ТО ПД-нің баспасөз қызметіне сілтеме жасаған DIDARBEK.kz.
Естеріңізге сала кетсек, әлеуметтік желіде жол бойында көлігімен артқа қарай жүріп, жол қауіпсіздігі ережесін бұзған жүргізушінің бейнежазбасы таралған болатын. Аталған құқықбұзушылықты жасаған «VOLKSWAGEN GOLF» маркалы көліктің жүргізушісін анықтау мақсатында Түркістан ҚПБ-ның қызметкерлері шұғыл әрекетке кірісті. Тексеру жұмыстары барысында жиырма жасар жүгенсіз жүргізуші анықталып, ол ҚР ӘҚБтК-нің 3 бабы бойынша жауапкершілікке тартылды.
Нақтырақ айтсақ, ӘҚБтК-нің 595-бабы «Маневр жасау қағидаларын бұзу», 606-бабы «Жол жүрiсiне қатысушының жол жүрiсi қағидаларын авариялық жағдай туғызуға әкеп соққан бұзушылығы», 614-бабы «Көлiк құралдарының жүруіне кедергi келтіру» бойынша хаттамалар толтырылды. Өз кезегінде Түркістан облысы полицейлері жолда жылдамдықты асырмауға, маневр жасау қағидаларын бұзбауға, мүмкіндігінше сақтық шараларын қолданып көлік басқаруға кеңес береді. Жоғарыдағыдай теріс әрекет жасап, өз өмірінен бөлек, өзге де көлік жүргізушілеріне қауіп төндіріп, жол бойында кедергі келтірудің соңы жақсылыққа апармайтынын ескертеді.
©️ DIDARBEK.kz
