Президент «Балалар жылы» аясында Үкіметке балаларды қорғау мақсатында, денсаулығын нығайтуға, және адамгершілік-рухани құндылықтарды қалыптастыруға бағытталған шаралары қабылдауды тапсырған белгілі. Бұл ретте ҚР Үкіметінің қаулысымен 7 бағыт бойынша бекітілген іс-шаралар жоспарының үшінші бағыты – «Дені сау бала» жобасы. Оның мақсаты – балалар мен мүмкіндігі шектеулі балалардың денсаулығын нығайту шараларын ұйымдастыру және олардың құқықтарын қорғау.
Бүгін Түркістан қаласы әкімдігінің “Жұмыспен қамту және әлеуметтік бағдарламалар” бөлімінің ұйымдастыруымен “Ұлы дала елі” орталығында дәстүрлі “Мейірімді жүрек” акциясы жалғасын тапты.
“Бала — ұлттың болашағы, еліміздің ертеңі, келешегіміздің келбеті. Сондықтан да оларға барынша көңіл бөлуді назардан тыс қалдырмауымыз керек”-деді қала әкімінің орынбасары Ерлан Күзембаев сөз алып.
Сонымен қатар, Түркістан қалалық мәслихат хатшысы Мақсат Таңғатаров пен шаһардың бас имамы Мұхамеджан Жұмадуллаев та өз кезегінде осындай қайырымды істің басы- қасында жүрген азаматтарға алғысын білдіріп, ізгі тілектерін жеткізді.
Балаларға жасалған қамқорлық пен жақсылыққа дән риза болған ата-аналар ұйымдастырушыларға алғыстарын жаудырып, еңбектеріне жеміс тіледі.
Шара соңы көңілді концертке ұласып, әр балаға бағалы сыйлықтар табысталды.
