Түркістан облысы әкімінің орынбасары Бейсен Тәжібаев кезекті қоғамдық қабылдауын өткізді. Онлайн және офлайн форматта өткен қоғамдық қабылдауда 10-нан астам тұрғынның өтініштері мен мәселелері тыңдалды. Өтініштердің басым бөлігі білім саласындағы мәселелелерді қамтыды. Мектеп салу, балабақшаны қосымша қаржыландыру және өзге де түйткілдер тарқатылды.
Жетісай ауданының тұрғыны өзі тұратын ауылға мектеп салу мәселесін көтерді. Ол зерделеніп, тиісті жауабы берілетін болды. Ал Түркістан қаласының педагогы қалалық білім бөлімі басшылығына деген шағымын айтты. Аталған шағымға байланысты тексеру жүргізіліп, екінші тараптың да уәжі тыңдалып, заң аясында шешім қабылданады.
Қабылдауға келген тұрғындардың бірі білім саласындағы мәселелерді қозғады. Сонымен бірге өзін жұмысқа қабылдау жөнінде өтінішін жеткізді. Тұрғын үй кезегі туралы ақпарат сұраған тұрғын да болды. Оларға заң аясында түсініктеме беріліп, мәселелері бақылауға алынды. Онлайн қабылдауда жұмыс сұраған ауыл тұрғынының өтініші де назарға алынатын болды. Оған заң шеңберінде көмек қарастырылмақ.
Биыл өңірде балабақшаларда мониторинг жұмыстары жүргізіліп, біраз кемшілік анықталған болатын. Соған байланысты балабақшаларды қаржыландыру ісі де қатаң қадағалауға алынды. Осы салаға қатысты сұрақтар қойылып, өтініштер айтылды. Балабақшаларына қосымша топ ашып, мемлекеттік қолдауды ұлғайту жөніндегі өтініштер сарапталып, заң аясында шешім қабылданады. Қоғамдық қабылдауға жазылғандардың бірі Марал ишан туралы кітабын шығару жөнінде ұсынысын жеткізді.
Бейсен Тәжібаев білім және мәдениет саласына жауапты басқарма басшылығына өздеріне қатысты хаттамаға енгізілген мәселелерді бақылауға алып, тұрғындар өтініші бойынша жұмыс жүргізуді тапсырды.
«Ашық әкімдіктегі» қабылдаулар тұрақты түрде жалғасын табады.
