Түркістан облысы әкімінің орынбасары Бейсенбай Тәжібаев Төлеби ауданына арнайы іссапармен барды. Аудандағы бірқатар әлеуметтік нысанды аралап, құрылыс барысын бақылады.
Зертас ауылдық округі, Шомшақты елді мекенінде бой көтерген жаңа фельдшерлік-акушерлік пункті, Көксәйек бастауыш мектебінде жүргізіліп жатқан ағымдағы жөндеу жұмыстарымен танысты. Биыл дәл осы елді мекенде тағы бір ФАП құрылысы басталды.
Облыс әкімі Дархан Сатыбалдының қолдауымен аймақтағы мектептер күрделі жөндеуден өтуде. Оған Төлеби ауданындағы мектептер де енгізілген. Бейсенбай Тәжібаев Қазақстан және Б.Биболатұлы жалпы орта мектептері, Қостөбе шағын жинақты жалпы орта мектебінде жүргізіліп жатқан күрделі жөндеудің жұмыс сапасын қадағалады.
Қостөбе шағын жинақты жалпы орта мектебі күрделі жөндеуден өткізілуде. Бүгінгі таңда Мердігер мекеме «Радуга-СН» ЖШС жобалық-сметалық құжатты негізге алып, жұмыстарды өндірістік кестеге сәйкес атқаруда. Қазіргі уақытта тиісті жұмыстардың 70 пайызы орындалды.
Ал Б.Биболатұлы жалпы мектебі 500 оқушыға арналған. Бұл білім ұясын күрделі жөндеуге жобалық-сметалық құжат дайындалып, сараптаманың оң қорытындысы алынған. 2024 жылға 400 млн. теңге қаржы қаралды. Жұмыстар жыл соңына дейін аяқталуы тиіс.
Облыс әкімінің орынбасары ғимараттардың құрылысына жауапты мердігерлермен кездесіп, нысандар талапқа сай болуы және кестеден кешікпеу қажеттігін ескертті. Нысандардың еденінен бастап, шатырына дейін сапалы материалдармен жаңартылуы тиіс екенін жеткізді. Халықтың денсаулығын жақсарту, балалардың сапалы білім алуына қолайлы жағдай жасау бойынша тиісті шаралар жоғары деңгейде атқарылу керектігін ескертті. Бүгінде мектептердің қабырғаларын сылау, едендері ауыстыру, ішкі әрлеу жұмыстары қарқын алған. Пәндік кабинеттер жабдықталуда.
Сапар барысында Кеңесарық елді мекеніндегі «Балауса» балабақшасы мен Керегетас елді мекеніндегі балалар лагеріне табан тіреді. Жазғы сауықтыру лагерінде демалып жүрген балалар, оларға келген ата-аналармер тілдесіп, жай-күйінен хабар алды.
100 орынға шақталған Көксәйек бастауыш мектебі мен 100 орындық «Балауса» балабақшасындағы ағымдағы жөндеу жұмыстары шілде айында аяқталуы тиіс. Сондай-ақ бірқатар мектептер күрделі жөндеуден өтуде. 300 орындық Қазақстан жалпы орта мектебінің құрылысы 2024-2025 жылдар аралығын қамтиды. Б.Биболатұлы атындағы 500 орындық білім ұясы келесі жылы ел игілігіне тапсырылады. 150 орындық Қостөбе шағын жинақты жалпы орта мектебіндегі құрылыс осы жылы қыс мезгілінде басталған еді. Күзге дейін бітеді.
Қазіргі таңда мектептердің қабырғаларын сылау, едендерін ауыстыру, ішкі әрлеу жұмыстары жасалып, пәндік кабинеттер жабдықталуда. Ғимараттардың құрылысына жауапты мердігерлер талаптарды орындап, кестеден кешікпей бітірулері қажет. Жұмыс сапасы мен қолданылатын материалдарға көңіл бөлінеді. Балалар біздің болашағымыз болғандықтан білім алуға қолайлы жағдай жасалады. Сапар аясында облыс әкімінің орынбасары Кергетас елді мекеніндегі балалар лагеріне соқты. Қазіргі таңда лагерде 400 бала жазғы уақытын тиімді өткізіп, демалуда.
