Түркістанда ұлт мақтанышы, қазақ елінің қазына байлығын зерттеуші, Қазақстан ғылым академиясының негізін қалаушы, ХХ ғасырдың ұлы тұлғасы Қаныш Сәтбаевтің 125 жылдығына арналған «Ғұлама ғалым» атты танымдық кеш өтті.
Шараға облыстық мәдениет және туризм басқармасының басшысының орынбасары Ержан Исатаев және қалалық білім бөлімінің басшысы Оразкүл Қолдасова қатысып, ғалымның ұлт үшін сіңірген еңбегіне тоқталды.
«Ұлы Дала Елі» орталығының және Қаныш Сәтбаев атындағы N12 мектептің ұйымдастыруымен өткізілген жиын барысында айтыскер ақын Тұрар Тілеулиев арнауын айтса, мың бұралған бишілер би билеп кеш көркін аша түсті. Сонымен қатар, «Қазақтың Қанышы» атты шағын қойылым сахналанды.
«Жақсы адамның аты мәңгі өшпейді» дегендей, артында өшпейтұғын із қалдырған Қаныш Имантайұлы – аса көрнекті ғалым- геолог қана емес, өз заманының әйгілі табиғат зерттеушісі, аты тарихта алтын әріптермен жазылған тұлға. Сондықтан да оның еткен еңбегі, елдің дамуына қосқан үлесі мен жарқын бейнесі мәңгі есте қалады.
