Қаладағы «Арена» көпфункционалды мәдени-спорт кешенінде Абай Құнанбайұлының 180 жылдығына орай оңтүстік халқының тартуы — Түркістан облысының ауыл шаруашылығы өнімдерінің жәрмеңкесі ұйымдастырылды.
Бардық. Түркістандық ағайындар өз өнімдерін алып келіпті. Халық көп. Сауда қызып жатыр. Өнім демекші, оңтүстікте өсетін қауынның түр-түрі, қарбыз, жидектерді ел кезекте тұрып, таласа сатып алып жатты. Бағасы біздің базар құнынан төмен. Сапалы, алыс жолдан жақсы сақталып жеткен екен. Балық, ет өнімдері де сатылып жатты. Қолөнер бұйымдарына да сұраныс көп. Жәрмеңкені аралап, концертті қызықтап, қауын-қарбыз, жеміс-жидектерді қуана-қуана сатып алып, түркістандық ағайындарымызға алғысымызды білдіріп, қайттық.
Түркістан облысынан келген өнерпаздардың тамаша концерті жәрмеңкеге келген барша абайлықтардың көңілін көтеріп, жәрмеңке аумағын дуылдатып-ақ жіберді. Халық көңілді. Ауа-райы да жақсы. Қоңыр салқын.
