Қыс қаһарына мінбей тұрып, Түркістан қаласында коммуналдық қызметтердің дайындығы тағы бір мәрте сараланды. Қала әкімі Әзімбек Пазылбекұлы арнайы жұмыс базаларын аралап, қар тазалау мен көктайғақтың алдын алуға жауапты техникалардың жағдайын жеке бақылаудан өткізді.
Соңғы жылдары жол инфрақұрылымы кеңейіп, асфальттанған көшелердің үлесі 66,7 пайызға дейін өскен шаһарда қысқы маусымның жауапкершілігі де арта түскені анық. Қазіргі есеп бойынша 845 шақырым жолдың 125 шақырымнан астамы – ең алдымен тазалануы тиіс бағыттар.
Коммуналдық мекемелер қысқа сақадай сай. «Түркістан Жарық Тазалық», «Жасыл ел», «Түркістан Су», «SK Geokard» ұйымдары және қалалық бөлімдер барлығы 52 арнайы техниканы әзірлеген. 550-ге жуық қызметкер тәулік бойы жұмыс істеуге дайын. Қажетті материалдар қоры да жеткілікті: 310 тонна құм, 500 тонна тұз бөлініп қойған.
Қар күреу жұмыстары үш негізгі бағыт бойынша жүргізілмек. Бұдан бөлек, қосымша көшелер, саябақтар және әкімшілік-іскерлік орталық аумағы да бақылауда.
Бұл тексеріс – қысқы маусымда қала халқының қауіпсіздігі мен ыңғайлы тіршілігін қамтамасыз етуге бағытталған нақты қадам. Түркістан биыл қысты техникалық жағынан тыңғылықты қарсы алмақ.
© Didarbek.kz
