Шымкент қаласында еліміз бойынша баламасы жоқ жаңа үлгідегі әмбебап жедел қызмет кешендерінің алғашқылары пайдалануға берілді. Бүгін Еңбекші ауданының Елтай тұрғын алабында өткен салтанатты ашылу рәсіміне Шымкент қаласының әкімі Ғабит Сыздықбеков пен Қазақстан Республикасы Төтенше жағдайлар министрі Шыңғыс Әрінов қатысты.
Министрдің айтуынша, мұндай кешендерді құру – Мемлекет басшысының нақты тапсырмасы және жедел қызметтердің тиімділігін арттыруға бағытталған маңызды қадам. Жаңа модель полиция, төтенше жағдайлар қызметі, өрт сөндіру және медициналық жедел жәрдем бөлімшелерінің бір нысанда шоғырланып, үйлесімді әрекет етуіне мүмкіндік береді. Интеграциялық тәсіл оқиға орнына жету уақытын қысқартып, ведомстволар арасындағы өзара іс-қимылды күшейтеді.
Елтай және Таскен шағын аудандарында ашылған модульдік кешендер осы заманауи талаптарға толық сай. Елтайдағы жаңа жедел қызмет бекеті 3309 шаршы метр аумақта орналасқан, жалпы жер аумағы — 7 мың шаршы метр. Кешен құрамына оқу мұнарасы, қызметкерлерге арналған кабинеттер, арнайы техникаға арналған бокстар мен маневр алаңы кіреді. Мұнда тәулік бойы шамамен 50 маман қызмет атқарады.
Салтанатты рәсімде сөз сөйлеген Шыңғыс Әрінов:
«Бірлесіп қызмет атқаратын депо алғаш рет ашылып отыр. Бұл – бүкіл елге үлгі боларлық бастама. Полиция, медицина, төтенше жағдайлар қызметі бір сапта тұрып, бір қауіпке бірге төтеп беруі – біздің басты қағидамыз. Қызметтеріңізге табыс тілеймін», – деді.
Жоба жергілікті бюджет есебінен небәрі алты айда жүзеге асырылып, қазіргі заман стандарттарына сәйкес толық жабдықталған. Кешен Елтай, Маятас, Тоғыс және Айнатас тұрғын алаптарында тұратын 25 мыңнан астам адамға қызмет көрсетеді.
Шара аясында төтенше жағдайлар жүйесінің дамуына үлес қосқан бірқатар азаматтар марапатталды. ҚР Төтенше жағдайлар министрінің Алғыс хаты Шымкент қаласы әкімінің бірінші орынбасары мен қалалық басқарма басшыларына табысталды. Сонымен қатар, сала ардагерлері мен қызметкерлеріне ҚР ТЖМ-нің 30 жылдық мерекелік медалі берілді.
Жергілікті тұрғындар жаңа кешендердің ашылуын қала қауіпсіздігін арттыру жолындағы айтарлықтай белес деп бағалады. Қазығұрт тұрғын алабы ақсақалдар кеңесінің төрағасы Батырхан Әшетов:
«Бұрын төтенше жағдай болғанда қызметтердің жетуіне біраз уақыт кететін. Енді бәрі бір жерден шығады. Айтып отырғандары – ең алыс нүктеге 7 минутта жету. Бұл – халық үшін өте құптарлық бастама», – деді.
Салтанатты рәсім лентаны қию және кешен жұмысын ресми түрде іске қосумен аяқталды. Қала әкімдігі жыл соңына дейін осындай тағы екі модульдік кешен ашуды жоспарлап отыр. Ал келесі жылы қосымша 7 нысанның құрылысы аяқталып, Шымкенттің жедел қызмет жүйесі толық жаңғыртылмақ.
Шымкент қаласында ашылған әмбебап жедел қызмет кешендері – бұл еліміздегі жедел қызмет жүйесінің жаңа кезеңге қадам басқанының айқын белгісі. Мұндай кешендер арқылы әртүрлі қызметтер бір жерде шоғырланып, халыққа көрсетілетін қызмет сапасы мен жылдамдығы артады. Әлеуметтік және мемлекеттік қызметтер арасында интеграциялау тәсілін қолдану, осыған дейінгі қиындықтарды шешуге, әсіресе төтенше жағдайлар кезінде үйлесімді әрекет етуге мүмкіндік береді. Жедел қызметтің тиімділігі тек қана уақытты үнемдеумен шектелмей, адамның өмірі мен денсаулығына қатысты маңызды шешімдер қабылдауға да оң әсерін тигізеді.
Жоба Шымкенттің дамуына қосылған тағы бір маңызды қадам болып табылады. Осылайша, қалада тұрғындардың қауіпсіздігі мен денсаулығына ерекше назар аударылып, кешендер тек жергілікті халыққа ғана емес, жалпы еліміздің әлеуметтік құрылымына да пайдалы ықпал етуде. Қазіргі заманғы инфрақұрылым мен технологияларды пайдалану арқылы қызметтер көрсету жүйесі халыққа жақындатылады және олар үшін қолжетімді болады. Мұндай бастамалар алдағы уақытта басқа қалаларда да жүзеге асырылуы мүмкін, бұл өз кезегінде еліміздегі қауіпсіздік деңгейін көтеруге үлес қосады.
Бұл жобаның ел деңгейінде іске асырылуы, тұрғындардың өмірін жақсарту және төтенше жағдайларға дайындықты арттыру бағытында үлкен серпіліс туғызады. Жедел қызметтердің барлығы бір алаңда жұмыс істеген кезде олардың тиімділігі бірнеше есеге артады. Сонымен қатар, мұндай кешендер қала өмірінің түрлі салаларындағы қызметтерді біріктіріп, әлеуметтік және экономикалық даму деңгейіне оң ықпал етеді.
