Шымкент қаласының әкімі Ғабит Сыздықбеков Қаратау ауданының тұрғындарымен көшпелі кездесу өткізді. Қайтпас, Мирас шағынаудандарының, Мәртөбе және Сайрам тұрғын алаптарының халқы өздерін толғандырған мәселелерді айтып, ұсыныстарын жеткізді.
Мазмұнды әңгіме барысында жаяу жүргіншілер жолдарын абаттандыру және кеңейту, жасыл желекті суару, қоқыс шығару, сондай-ақ, инженерлік инфрақұрылым жүргізу және оған қызмет көрсету мәселелері көтерілді.
Мұнымен қоса, жер қатынастары, азаматтарды әлеуметтік қолдау, аулаларды абаттандыру, жолдарды асфальттау, бағдаршамдар мен жүк көліктеріне арналған салмақ бақылау бекеттерін орнату мәселелері талқыланды.
Тұрғындар, сондай-ақ, балабақша мен мектеп салу, спорт және балалар алаңдарын күтіп ұстау, дәрігерлік амбулатория ғимаратын «РайМед» медициналық орталығына жалға беру жөнінде ұсыныстарын айтты.
Айта кету керек, мегаполис басшысы тұрғындардан түскен өтініштерді жан-жақты қарап, оларды іске асырудың мүмкін тетіктері мен алдағы қадамдарын түсіндірді. Қосымша пысықтауды қажет ететін мәселелер бақылауға алынып, кезең-кезеңімен шешілетін болады.
Аудан әкімі мен басқарма басшыларына тұрғындардан түскен өтініштердің орындалуын тұрақты бақылауда ұстау тапсырылды.
Кездесу ашық диалог форматында өтіп, тұрғындардың өзекті мәселелерді тікелей қала басшысына жеткізуіне мүмкіндік берді. Азаматтар көтерген әрбір ұсыныс пен өтініш бойынша жауапты мекемелердің өкілдері нақты түсініктемелер беріп, атқарылатын жұмыстардың мерзімі мен тәртібін баяндады.
Қала әкімі аудан аумағын кешенді дамыту жұмыстары кезең-кезеңімен жалғасатынын атап өтті. Әсіресе, инженерлік инфрақұрылымды жетілдіру, тұрғындарға қолайлы орта қалыптастыру және әлеуметтік нысандардың қолжетімділігін арттыру бағытындағы жобаларға басымдық берілетінін жеткізді.
Сонымен қатар, тұрғындардың өмір сүру сапасын жақсарту мақсатында қоғамдық кеңістіктерді дамыту, көгалдандыру жұмыстарын күшейту және санитарлық тазалықты сақтау мәселелеріне ерекше назар аударылатыны айтылды. Бұл бағыттағы жұмыстар ауданның тұрақты дамуына және тұрғындардың әл-ауқатын арттыруға ықпал етеді.
Кездесу қорытындысында қала басшысы халықпен кері байланысты нығайту жергілікті атқарушы органдар жұмысының басты қағидаттарының бірі екенін атап өтті. Тұрғындардың пікірлері мен ұсыныстары алдағы жоспарларды қалыптастыру кезінде ескеріліп, көтерілген мәселелердің орындалу барысы тұрақты бақылауда болады.
