Шымкентте Қала күніне орай ұйымдастырылып жатқан мерекелік іс-шаралар легі республикалық ақындар айтысымен жалғасты. Дәл қазір «Түркістан» сарайында «Шырайлы, шежірелі құтты мекен…» атты республикалық ақындар айтысы өтіп жатыр. Қала әкімдігінің қолдауымен ұйымдастырылған рухани шараға еліміздің әр өңірінен танымал айтыскер ақындар қатысуда.
Дүбірлі додада Жансая Мусина мен Иран-Ғайып Күзембаев, Дидар Қами мен Мейіржан Жақып, Ержан Әміров пен Біржан Байтуов, Қайырхан Жұбаниязов пен Нұрмахан Жақыпбек, Серік Қуанған мен Нұрмат Мансұр, Рауан Қайдар мен Қажымұхан Абзалов өзара жұп құрды.
Айтысты Қазақстан Республикасының Еңбек сіңірген қайраткері, «Құрмет» және «Парасат» ордендерінің иегері Аманжол Әлтай тізгіндесе, қазылар алқасына Қазақстанның халық жазушысы, қазақ айтыс өнерінің абызы Жүрсін Ерман төрағалық етуде.
Айтысты тамашалауға қала тұрғындары мен қонақтары көптеп жиналды. Залға лық толған өнерсүйер қауым ақындардың әрбір ұтымды ойы мен өткір әзілін зор қошеметпен қабылдап, ерекше ықылас танытуда. Айтыс барысында ақындар ел бірлігі, ұлттық құндылықтар, туған жерге деген сүйіспеншілік пен Шымкенттің өткені мен бүгінін жырға қосып, көрерменнің ыстық ықыласына бөленіп жатыр.
Республикалық ақындар айтысы биыл екінші рет ұйымдастырылып отыр. Өткен жылдан бастау алған бұл рухани дода енді жыл сайын Қала күні аясында дәстүрлі түрде өткізілмек. Бүгінгі айтыстың бас жүлде иегері 5 миллион теңгені қанжығасына байлайтын болады.
Айтыс – халқымыздың ғасырлар бойы жалғасып келе жатқан рухани мұрасының ажырамас бөлігі. Осындай тағылымды өнер додалары ұлттық құндылықтарды дәріптеп қана қоймай, жас ұрпақтың төл мәдениетке деген қызығушылығын арттыруға ықпал етеді. Шымкент төрінде өткен жыр сайысы да осы мақсатқа қызмет етіп, көрерменге ерекше әсер сыйлады.
Байрақты бәсекеде ақындар қоғамдағы өзекті мәселелерді де назардан тыс қалдырмай, терең ой мен ұтқыр сөз арқылы көпшіліктің көңілінен шықты. Суырыпсалмалық өнердің биік деңгейін көрсеткен қатысушылар айтыстың өміршеңдігін тағы бір мәрте дәлелдеді.
Қала күні аясындағы бұл ауқымды мәдени шара Шымкенттің рухани тынысын айшықтап, өңірдің мәдени өміріндегі маңызды оқиғалардың біріне айналды. Мұндай игі бастамалар қаланың мәдени әлеуетін арттырып, ұлттық өнердің кеңінен насихатталуына жол ашады.
