Шымкент қаласы әкімінің тұрғындармен өткен көшпелі кездесу барысында көтерілген мәселелер бойынша берілген тапсырмаларды орындау жұмыстары Тұран ауданы әкімі тарапынан тұрақты бақылауға алынып, жүзеге асырылуда.
Тұран ауданының әкімі аталған тапсырмалар аясында көпқабатты тұрғын үйлердегі кәсіпкерлік нысандарының қызметі, коммуналдық қызметтердің жұмысы, қаңғыбас және қараусыз жануарларға қатысты шаралар, аулаларды абаттандыру және кәріз жүйелерін ретке келтіру бағытындағы мәселелерді жеке бақылауына алды.
Сонымен қатар тұрғын үйді жаңғырту және реновация бағдарламаларының шарттары, қоғамдық тәртіпті қамтамасыз ету, балалар және спорт алаңдарын жаңарту, бейнебақылау камераларын орнату, көпқабатты үйлердегі тозған лифт жабдықтарын ауыстыру мәселелері бойынша тиісті жұмыстар аудан әкімі тарапынан қадағалануда.
Аудан әкімі тұрғындардан түскен барлық өтініштерді жан-жақты зерделеу, нақты шешімдер қабылдау және орындалуын қатаң бақылауда ұстау бойынша жауапты сала басшыларына тапсырма берді.
Тұрғындармен кері байланысты нығайту және көтерілген мәселелерді жедел шешу жұмыстары тұрақты бақылауда болады.
Қала әкімінің тапсырмаларын тиімді іске асыру мақсатында инженерлік инфрақұрылым нысандарына тұрақты мониторинг жүргізу жұмыстары күшейтілді. Атап айтқанда, кәріз жүйелерінің жай-күйі, ауызсу және электр желілерінің сенімділігі бойынша кешенді тексерулер ұйымдастырылып, анықталған ақауларды жедел жою тетіктері іске қосылуда.
Сонымен қатар, тұрғын үй-коммуналдық шаруашылығы саласында қызмет көрсетуші мекемелердің жұмыс сапасын арттыру және олардың жауапкершілігін күшейту бағытында нақты шаралар қабылдануда. Қоғамдық аумақтарды күтіп-ұстау, санитарлық тазалық және көгалдандыру жұмыстары жүйелі түрде бақылауға алынды.
Цифрландыру элементтерін енгізу аясында бейнебақылау жүйелерін кеңейту және коммуналдық қызметтерді басқаруда заманауи мониторинг құралдарын пайдалану қарастырылуда. Бұл өз кезегінде қоғамдық қауіпсіздікті арттырып, тұрғындардың өтініштеріне жедел әрекет етуге мүмкіндік береді.
Алдағы кезеңде аудан аумағында атқарылып жатқан барлық жұмыстардың сапасы мен мерзімінде орындалуы бойынша кешенді бақылау жалғасып, жауапты сала басшыларының есептілігі тұрақты түрде қаралатын болады.
