Шымкент қаласының әкімі Ғабит Сыздықбеков Қазақстан Республикасындағы Үндістан Республикасының Төтенше және Өкілетті Елшісі Сайлас Тангал бастаған делегациямен кездесті.
Кездесу барысында сауда-экономикалық, инвестициялық және өнеркәсіптік ынтымақтастықты кеңейту перспективалары, екі елдің іскер топтары арасындағы тікелей байланыстарды дамыту және бірлескен жобаларды жүзеге асыру мәселелері талқыланды.
Қала әкімі Шымкенттің инвестициялық және өнеркәсіптік әлеуетін таныстырып, мегаполистің еліміздің ірі экономикалық орталықтарының бірі ретіндегі бәсекелестік артықшылықтарына тоқталды. Сондай-ақ инвестиция тарту, өндірістік кооперацияны дамыту, көлік-логистика инфрақұрылымын жетілдіру және өзара сауда көлемін ұлғайту бағыттарына ерекше назар аударылды.
Кездесу аясында делегация мүшелері «Қазақстанның үздік тауары – 2026» және «Бір ауыл – бір өнім» өңірлік көрме-байқауларының экспозициясын тамашалады. Көрмеде 100-ден астам жергілікті тауар өндіруші тамақ, фармацевтика, химия, жеңіл өнеркәсіп, құрылыс индустриясы және өзге де салалардағы өнімдерін ұсынды.
Іскерлік бағдарлама аясында Қазақстан–Үндістан бизнес-форумы өтіп, Үндістан Өнеркәсіп конфедерациясы мен Шымкент қалалық кәсіпкерлер палатасы арасында өзара түсіністік туралы меморандумға қол қойылды. Сонымен қатар жаңа серіктестік байланыстарды дамытуға және бірлескен жобаларды іске асыруға бағытталған B2B форматындағы кездесулер ұйымдастырылды.
Көрме барысында кәсіпкерлер өз өнімдерін таныстырып қана қоймай, тұтынушылармен және іскерлік орта өкілдерімен тікелей байланыс орнатуға мүмкіндік алды. Мұндай алаңдар жаңа серіктестік байланыстарды қалыптастырып, жергілікті тауар өндірушілердің нарықтағы орнын нығайтуға жол ашады.
«Бір ауыл – бір өнім» жобасы аясында ұсынылған тауарлар жергілікті шикізат пен ұлттық ерекшеліктерді тиімді пайдаланудың мүмкіндігін көрсетті. Жоба ауыл тұрғындарының кәсіпкерлік қабілетін дамытуға, жаңа өнім түрлерін шығаруға және өз еңбегін нарыққа ұсынуға қолдау көрсететін маңызды алаңдардың біріне айналып келеді.
Кәсіпкерлер үшін мұндай байқаулар өнім сапасын жетілдіруге, өндіріс үдерісін жаңғыртуға және жаңа нарықтарға шығуға ынталандырады. Ал тұтынушылар үшін жергілікті жерде өндірілетін сапалы тауарлармен танысып, отандық өнімге деген сұранысты арттыруға мүмкіндік береді.
Кездесу қорытындысы бойынша қол жеткізілген келісімдер Шымкент пен Үндістан Республикасы арасындағы инвестициялық, сауда-экономикалық және іскерлік ынтымақтастықты жаңа деңгейге көтеруге мүмкіндік беретіні атап өтілді.
