Шымкент қаласында мемлекеттік қаражаттың заңды әрі тиімді жұмсалуын қамтамасыз ету және экономикалық құқық бұзушылықтардың алдын алу бағытындағы жұмыстар жүйелі түрде жүргізілуде. Бұл туралы Өңірлік коммуникациялар қызметінің ақпарат алаңында өткен брифинг барысында айтылды.
Экономикалық қауіпсіздікті қамтамасыз етуде негізгі басымдық – құқық бұзушылық орын алғаннан кейін оның салдарын жою емес, ықтимал тәуекелдерді алдын ала анықтап, бюджет қаражатының тиімсіз жұмсалуына жол бермеу. Осыған байланысты тиісті құрылымдар мемлекеттік органдардың қызметін талдап, бюджет шығыстарын және мемлекеттік сатып алуларды тұрақты түрде мониторингтен өткізеді.
Бақылау жұмыстарында заманауи цифрлық технологиялар мен деректерді кешенді талдау құралдары да пайдаланылуда. Бұл тәуекелі жоғары жобаларды ерте анықтап, күмәнді қаржылық операцияларға назар аударуға және ықтимал шығындардың алдын алуға мүмкіндік береді.
Атқарылған профилактикалық шаралардың нақты нәтижесі ретінде 2025 жыл мен 2026 жылдың бірінші жартыжылдығында 23,4 млрд теңге бюджет қаражатының үнемделгенін атап өтуге болады. Сонымен бірге өткен жылы анықталған 84 қылмыстық іс бойынша мемлекетке келтірілген 15,9 млрд теңге залалдың 7,5 млрд теңгесі қайтарылған.
Алдағы кезеңде тәуекелдерді басқару жүйесін жетілдіру, цифрлық талдау мүмкіндіктерін кеңейту және бюджеттік жоспарлаудың тиімділігін арттыруға басымдық беріледі. Негізгі мақсат – бюджет қаражатын сақтап қана қоймай, оның әрбір теңгесінің нақты нәтижеге бағытталуына ықпал ету.
Профилактикалық жұмыстардың маңызды бағыты – мемлекеттік қаражатты басқару кезінде ашықтық пен жауапкершілік қағидаттарын күшейту. Осы ретте бюджет қаражатын жоспарлау мен игерудің әр кезеңіне талдау жүргізіліп, анықталған тәуекелдер бойынша тиісті шаралар қабылдануда. Мұндай тәсіл қаржылық тәртіпті арттырып, заң бұзушылықтарға әкелуі мүмкін жағдайларды ерте кезеңде жоюға мүмкіндік береді.
Сонымен қатар, экономикалық құқық бұзушылықтардың алдын алуда мемлекеттік органдармен қатар кәсіпкерлік субъектілерінің де құқықтық сауаттылығын арттыруға мән берілуде. Түсіндіру және алдын алу шаралары арқылы заң талаптарын сақтау мәдениетін қалыптастыру, адал бәсекелестікті қолдау және қаржылық тәртіпті нығайту көзделіп отыр.
Жалпы, жүйелі мониторинг пен алдын алу тетіктерінің күшеюі мемлекеттік қаржының тиімді басқарылуына оң ықпал етуде. Бұл бағыттағы жұмыстар экономикалық тұрақтылықты қамтамасыз етіп, бюджет қаражатының мақсатты жұмсалуына және қоғамдық мүдденің қорғалуына бағытталатын болады.
