Шымкент қаласында жол және көлік инфрақұрылымын дамыту жұмыстары кезең-кезеңімен жүзеге асырылып, тұрғындардың қауіпсіз әрі қолайлы қозғалысын қамтамасыз етуге бағытталуда. 2024–2026 жылдар аралығында негізгі магистральдар мен қалаішілік көшелерді жаңарту, жаңа жолдар салу, көлік қозғалысын реттеу және жол қауіпсіздігін арттыру бойынша бірқатар ауқымды жобалар іске асырылуда.
2024 жылы қаладағы жақсы және қанағаттанарлық деңгейдегі жолдардың үлесі 75 пайызды құрады. Бұл көрсеткішті 90 пайызға дейін жеткізу жоспарланып отыр. Сонымен қатар, 2024 жылы жалпы ұзындығы 269,5 шақырым болатын жолдар пайдалануға берілді. Оның ішінде ұзындығы 20,1 шақырымды құрайтын 4 негізгі көше бар. Атап айтқанда, А-2 айналма жолын қайта құрудың 4-кезеңі, Өтегенов көшесінің жалғасының 1 және 2-кезектері және Оңтүстік айналма жолы пайдалануға берілді. Орташа жөндеу аясында 247 көшедегі 167,1 шақырым жол жаңартылды.
2025 жылы жол инфрақұрылымын дамыту жұмыстары одан әрі кеңейтілді. Жылдың 9 айының қорытындысы бойынша 590,6 шақырым жол салынды. Осылайша, 2024–2025 жылдары қала аумағында пайдалануға берілген жолдардың жалпы ұзындығы 860,1 шақырымға жетті. Сонымен бірге, 2025 жылы 323 көшеде жалпы ұзындығы 201 шақырым болатын орташа жөндеу жұмыстары толық аяқталды.
Қаладағы ірі инфрақұрылымдық жобалардың бірі – Қонаев даңғылының жалғасын салу. Жалпы ұзындығы 16,3 шақырымды құрайтын нысанның 1, 3 және 4-кезеңдері бұған дейін пайдалануға берілсе, 2025 жылы 2-кезеңі толық аяқталды. Қазіргі таңда 5-кезеңнің құрылысы жалғасып, жобаны толық аяқтау 2026 жылға жоспарланған.
А-2 автомобиль жолын қайта құру жобасы да кезең-кезеңімен іске асырылуда. Жалпы ұзындығы 28,2 шақырым болатын жоба 8 кезеңнен тұрады. Бұған дейін оның 1–4 кезеңдері пайдалануға берілсе, 6 және 8 кезеңдері аяқталды. Ал 5 және 7 кезеңдер бойынша құрылыс жұмыстары жүргізілуде.
Қаладағы көлік жүктемесін азайту және балама бағыттарды қалыптастыру мақсатында Алтынсарин, Қазиев және Жандосов көшелерінің жалғасы, Шұбаркөл көшесі, Асар және Shymcity шағынаудандарын байланыстыратын жол, Қызылсай шағынауданына кіреберіс жол, сондай-ақ Момынов және Тіленшин көшелеріндегі теміржол өткелдері бойынша жұмыстар атқарылды.
Жол қозғалысының қауіпсіздігін арттыру бағытында да нақты нәтижелер бар. 2025 жылы 201 жаяу жүргіншілер өткелі жарықтандырылып, 2 291 көшеге түнгі жарық шамдары орнатылды. Нәтижесінде қаладағы жарықтандыру көрсеткіші 100 пайызға жетті. Бұған қоса, 1 000 шақырым жол таңбасы сызылып, 100 шақырым тротуар салынды, 310 жол құдықшасы ауыстырылып, 32 жаңа бағдаршам орнатылды.
Көлік қозғалысын басқарудың заманауи жүйелерін енгізу жұмыстары да жалғасуда. 98 бағдаршам интеллектуалды көлік жүйесіне қосылып, қала бойынша ITS жүйесімен қамту деңгейі 88 пайызды құрады. Жалпы 395 нысанның 346-сы аталған жүйеге қосылған. Бағдаршамдардың үздіксіз жұмысын қамтамасыз ету мақсатында 24 орында жаңарту жүргізіліп, 72 нысанға жаңа тоқтаусыз қуат көздері орнатылды. Нәтижесінде 96 бағдаршам осындай жүйемен қамтылды. 2026 жылы тағы 15 нысанды қамту жоспарланып отыр.
2025 жылы ұзындығы 17,1 шақырымды құрайтын 6 көше мен 1 көпірге күрделі жөндеу жүргізілді. Олардың қатарында Юсупов, Тамшыбұлақ, Жаңа Қоныс, Ізенді, Ю. Сареми және Жаңақұрылыс көшелері, сондай-ақ Қойкелді батыр көшесіндегі көпір бар. Жұмыстардың нәтижесінде 4 көше мен Қойкелді батыр көшесіндегі көпір пайдалануға берілді. Сонымен қатар, қала инфрақұрылымын одан әрі дамыту мақсатында әуежайдың ұшу-қону жолағын салу және Бәйдібек би – Төлеметов жолайрығын салу жобалары қарастырылуда.
Шалғай және ішкі орам көшелерінің жағдайын жақсарту бойынша да ауқымды жоспарлар бар. 2025–2026 жылдары жалпы 938 шақырым жол салу жоспарланған. Оның 637 шақырымында асфальт төсеу көзделсе, қазіргі таңда 304 шақырымында жұмыстар орындалды.
2026 жылы жол инфрақұрылымын жаңарту жұмыстары жалғасуда. Бұған дейін басталған жобаларды аяқтаумен қатар, қала көшелерінің жағдайын жақсартуға, қозғалыс қауіпсіздігін қамтамасыз етуге және көлік ағынын тиімді ұйымдастыруға бағытталған жаңа жұмыстар жүргізілуде.
Жалпы, 2024–2026 жылдардағы жұмыстар Шымкент қаласының жол-көлік инфрақұрылымын кешенді жаңғыртуға бағытталған. Негізгі жолдардың, ішкі орам көшелерінің, көпірлер мен жаяу жүргіншілер инфрақұрылымының жаңаруы қала тұрғындарының қатынасын жеңілдетіп, көлік қозғалысының қауіпсіздігі мен тиімділігін арттыруға мүмкіндік береді.
Шымкент қаласында жол инфрақұрылымын жаңғырту кезең-кезеңімен және кешенді түрде жалғасуда. Жобалар қала тұрғындарының қолайлы әрі қауіпсіз қатынауын қамтамасыз етуге бағытталған.
