2026 жылдың қаңтар-шілде айларында Шымкент қаласының кәсіпорындары 969,5 млрд теңгенің өнімін өндірді. Бұл өткен жылдың сәйкес кезеңімен салыстырғанда 10,7%-ға жоғары.
Қаланың өнеркәсіп құрылымындағы негізгі үлес (86,8%) өңдеу өнеркәсібіне тиесілі. Есепті кезеңде бұл салада 847,2 млрд теңгенің өнімі өндіріліп, нақты көлем индексі 109,5%-ды құрады.
Өңдеу өнеркәсібінің негізгі салаларында тұрақты өсім қалыптасты. Атап айтқанда, сусын өндіру көлемі – 2,9 есеге, өзге де бейметалл минералдық өнімдер өндіру – 76,9%-ға, металлургия өнеркәсібі – 55,1%-ға, химия өнеркәсібі – 50%-ға, машина жасау 28,3%-ға артты.
Сонымен қатар, дайын металл бұйымдарын өндіру – 26,2%-ға, резеңке және пластмасса бұйымдарын өндіру – 25,8%-ға, тамақ өнімдерін өндіру – 15,3%-ға, қағаз және қағаз өнімдерін өндіру – 11,8%-ға, ал жеңіл өнеркәсіптегі өнім көлемі 4,4%-ға өсті.
Өңдеу өнеркәсібінің қарқынды дамуы, өндіріс көлемінің артуы және өнеркәсіптік әлеуеттің кеңеюі қаланың экономикалық өсіміне оң ықпал етіп, жаңа жұмыс орындарының ашылуына мүмкіндік беріп отыр.
Сонымен қатар, жеңіл өнеркәсіп саласында да өндіріс көлемінің өсімі байқалады. Шымкент қаласындағы «Оңтүстік» арнайы экономикалық аймағының аумағында орналасқан «Назар Текстиль» ЖШС кілемдер мен кілем бұйымдарын өндіру бағытындағы жобасын табысты жүзеге асырып келеді.
Кәсіпорынға 1,8 млрд теңге көлемінде инвестиция тартылып, 140 тұрақты жұмыс орны ашылды. 2014 жылы іске қосылған өндіріс орны бүгінде тұрақты жұмыс істеп, өңірдегі жеңіл өнеркәсіптің дамуына және отандық өндіріс көлемінің артуына өз үлесін қосуда.
Кәсіпорын іске қосылғаннан бері жалпы құны 8,54 млрд теңгенің өнімін өндірді. Бұл көрсеткіш «Назар Текстиль» ЖШС-нің отандық кілем өндірісін дамытудағы әлеуеті мен өндірістік мүмкіндігінің тұрақты екенін көрсетеді.
Жеңіл өнеркәсіп саласын дамыту, отандық өндірушілерді қолдау және өндірістік кәсіпорындардың әлеуетін арттыру – Шымкент қаласының экономикалық дамуының басым бағыттарының бірі.
Жалпы, өнеркәсіп өндірісіндегі оң динамика Шымкенттің өндірістік әлеуетінің артып келе жатқанын көрсетеді. Жаңа жобалардың іске қосылуы, жұмыс істеп тұрған кәсіпорындардың өндіріс көлемін ұлғайтуы және инвестиция тарту қала экономикасының тұрақты дамуына негіз болып отыр. Бұл көрсеткіштер Шымкенттің өндірістік әлеуеті артып, қаланың экономикалық өсімі тұрақты жалғасып келе жатқанын көрсетеді.
