Көмір жағып қиналған кентаулықтар жуырда көгілдір отынмен қамтылмақ, деп жазады «Отырар» телеарнасының тілшісі Ш.Оразованың материалына сілтеме жасаған didarbek.kz.
«Кентаудағы тозығы жеткен «ТЭЦ-5»- жылу орталығын қайта салуға 40 млрд. теңге қажет етеді. Біз қажетті есепті жүргіздік. Егер де биыл кеншілер қаласы табиғи газбен қамтылатын болса, онда әрбір үйге жеке шағын қазандықты орнатуды жоспарлаудамыз. Бұл жоба 9 млрд. теңгені талап етеді. Қалалықтар көгілдір отынға қосылса, тек тұтынған газға ғана төлейді. Керек кезде суын да жылытады, пеш жағудың қажет жоқ, газбен батарейлер жылытылады.
Жылдың соңына дейін Кентауды 100 пайыз газбен қамтуды жоспарлаудамыз», — деді облыс әкімі Өмірзақ Шөкеев есепті жиында.
Расында, алдағы уақытта жоба іске асып, заман талабына сай кентаулықтар табиғи газбен қамтамасыз етіліп жатса, нұр үстіне – нұр. Өңір басшысы айтқандай, тек қана тұтынған газға төлеп, көмір іздеп сабылудың қажеттілігі болмасы анық.
