Балалар жылына орай Түркістан қаласында жаратылыстану-математикалық циклы пәндері бойынша Президенттік олимпиада өтті, деп хабарлайды Түркістан қаласы адами әлеуетті дамыту бөлімінің баспасөз қызметіне сілтеме жасаған «didarbek.kz» ақпаратық агенттігі.
Жалпы, президенттік олимпиаданың арқасында оқушыларымыз өз әлеуетін ашып, білім гранттары түріндегі қомақты қолдауға ие болып жатыр. Балалардың олимпиадаға қатысу көрсеткіші өсіп келеді. Олар математика, биология, химия және физика пәндері бойынша білімдерін сарапқа салды.
11-сынып оқушылары арасындағы олимпиаданың қалалық кезеңіне 30 оқушы қатысып, химия, математика, физика және биология пәндері бойынша тапсырмаларды орындады.
Олимпиадаға арнайы барған Түркістан қаласы адами әлеуетті дамыту бөлімінің басшысы Оразкүл Қолдасова оқушылармен еркін пікірлесіп, сәттілік тіледі. Өз кезегінде оқушылар да білім бәсекелері, Ұлттық бірыңғай тестілеу жөнінде өз ойларын ортаға салды.
«Жаңа оқу жылының басталуымен құттықтаймын. Бітіруші түлектерге ҰБТ-да жоғары балл жинауына тілектеспін. Оқуды жақсы аяқтап, армандаған университеттеріңе түсіңдер. Президенттік олимпиадада бақтарың жансын»,- деді Оразкүл Шайхықызы.
Олимпиада қорытындысы бойынша алғашқы орындарды иеленген 3 оқушы яғни №17 Ататүрік атындағы мектеп-гимназияның оқушысы Аружан Әнуар, №23 Ж.Тәшенов атындағы ІТ мектеп-лицейінің оқушысы Сандуғаш Қасым, №28 мектеп-лицейінің оқушысы Мерей Жеңісқызы олимпиаданың облыстық кезеңіне жолдама алды. Түркістандық үздік үштік облыстық олимпиадада бақ сынайды.
