«Қазақстан Республикасының Мемлекеттік қызмет істері агенттігінің Түркістан облысы бойынша департаменті» республикалық мемлекеттік мекемесінен оның басшысы және Әдеп жөніндегі кеңес төрағасы Ержан Қарымсақов қол қойған Ордабасы ауданының білім бөлімінің басшысы бос мемлекеттік әкімшілік лауазымына жарияланған конкурс қорытындысына қатысты Гулнур Батырбайқызы Сулейменоваға үшбу хат келді.
Қысқасы, мемлекеттік мекеме осыдан бір ай бұрын шығарған өз шешімін оп-оңай бұза салды. Кім біледі, Гүлнұрдың «биографиясы» келмей қалды ма, әлде «географиясы» келмей қалды ма? Бірақ, «өз еркімен бас тартуға» мәжбүрлеуге әрекеттер жасалмады емес, тіптен арада қорқыту-үркіту белгілері де белең алғаны бар. Керек десеңіз, менің өзіме де Гүлнұрды «тоқтату» туралы «елші» жіберілді. Демек, бірде-бір қитұрқылықтары іске аспаған соң, шала-жансар арыз ұйымдастырылып, сол арызды желеу еткен шенеуніктер қос-қосынан мына бір жазбаны жіберді. Осыны ұйымдастырған бастары шіки шенеуніктердің арқасында мемлекеттік құрылымдарға, мемлекеттік конкурстарға деген сенім сөне береді екен.
Бұған, байқауымызша, Е.Қарымсақов та, Ғ.Орынов та ұялар емес! Әрине, ұяттан бес күн бұрын туғандар болады дегенді естуші едік, бірақ бұндай сорақылыққа жол бергендері аттарына кір келтіреді деп ойламағаны қалай?
Иә, құдайдан қорықпайтындар билік тізгінін ұстайтын болса, бұдан өткен сорақылықтарды көріп, сорлап қаламыз ба деген қауіп те жоқ емес!..
© Әсет Әссанди,
«ЕЛ НАМЫСЫ»
Арнайы мониторингтік тобының
Түркістан облысы бойынша жетекшісі.
